Një ide që ndoshta pak kohë më parë do të dukej e pabesueshme, por që sot ka fituar gjithnjë e më shumë terren në zyrat e Milanit: Luka Modric mund të bëhet përforcimi i bujshëm i verës për kuqezinjtë e Massimiliano Allegrit. Mesfushori kroat, i lindur në vitin 1985, sapo është ndarë me ‘Santiago Bernabeun’ dhe pas Kampionatit Botëror për Klube do të largohet zyrtarisht edhe nga Real Madridi, duke i dhënë fund një epoke të lavdishme.
Modric dëshiron të jetë në formën më të mirë për Botërorin e vitit 2026 që do të zhvillohet në SHBA, Meksikë dhe Kanada, dhe është gati për një aventurë të fundit në karrierën e tij, e gjitha me parametër zero.
Igli Tare, që tashmë është pjesë e drejtuesve të rinj kuqezinj, ka identifikuar një mundësi të rrallë, që do të kishte jehonë të madhe, sidomos duke ditur lidhjen emocionale të Modric-it me fanellën e Milanit, atë që dikur e veshi idhulli i tij, Zvonimir Boban.
Milani, pra, nuk është një klub si çdo tjetër për Modric-in. Një telefonatë nga Via Aldo Rossi mund të mjaftonte për ta tunduar, edhe pse mungesa e kupave evropiane sezonin e ardhshëm mbetet një pengesë serioze. Në fakt, kjo dhe konkurrenca nga klube të tjera që shpresojnë ta marrin me parametër zero janë pengesat më të mëdha. Kroati nuk kërkon një kontratë të majme, por do të sillte me vete klas, eksperiencë dhe personalitet, pikërisht çfarë i mungon skuadrës së Allegrit.
Për momentin nuk ka negociata të avancuara, pasi Modric nuk ka nxitim dhe dëshiron të konsultohet me familjen përpara se të marrë një vendim. Pas angazhimit të fundit me Realin në Botërorin për Klube, ai do të mendojë për të ardhmen dhe për këtë përvojë të fundit në karrierë, në prag të të 40-ave, zemra mund ta çojë drejt skuadrës që e ka dashur që në fëmijëri.
Marrë nga SportMediaset.it
