Një ngjarje skandaloze, që përfshin bluzat e bardha po zhvillohet para syve të autoriteteve në kryeqytet. Personazhe të shumtë të vetëquajtur mjekë, të ardhur nga vendet e huaja, Ballkan, Evropë apo Lindja e Mesme vijnë në Shqipëri dhe ushtrojnë aktivitetin e tyre në fushën e mjekësisë.
Ato e reklamojnë punën që bëjnë online, nga ku tërheqin edhe “prenë” e tyre, pacientët shqiptarë të dëshpëruar për një zgjidhje të shpejtë dhe efikase për shëndetin.
Duke u nisur nga origjina e tyre, ato krijojnë më shumë besueshmëri, pasi të gjithë e dimë “mitin” e shqiptarëve, kur bëhet fjalë për specialistë të ardhur nga jashtë.
Në një intervistë për “Top Chanel”, kreu i Urdhrit të Mjekut, Fatmir Brahimaj shprehet se nuk është në dijeni të këtyre mjekëve dhe mohon që ato të jenë pajisur me licencën përkatëse për të ushtruar aktivitetin e tyre në Shqipëri në Shëndetësi.
Sipas Brahimaj, bazuar në ligj askush nuk mund të ushtrojë aktivitetin pa licencën përkatëse të vendit ku po ushtron profesionin, ndërsa shton se Kodi i Etikës në vendin tonë e ndalon kategorikisht reklamimin e mjekut, gjë që nuk zbatohet nga mjekët e huaj në fjalë.
“Sipas ligjit, askush nuk mund të ushtrojë aktivitetit pa u licencuar duhet çdo mjek që vjen të licencohet. Kodi etikës e ndalon reklamën e mjekut. Mjeku nuk është hotel me 5 yje apo pa yje fare. Thuhet është një ndër 10 më të mirët në botë. Po nuk kam informacion të kenë ardhur mjekë të tillë këtu”,- shprehet kreu i Urdhrit të Mjekut, Fatmir Brahimaj.
Gjithashtu, janë evidentuar edhe mjekë të tjerë, ose që hiqen si të tillë që ofrojnë konsulta mjekësore për pacientët për t’i dërguar ato në spitalet jashtë Shqipërisë, me qëllimin për të vijuar me procesin e trajtimit të sëmundjes së tyre.
“Edhe kjo duhet ndaluar sepse më parë duhet të bësh një konsultë nëse rasti është për t’i trajtuar në Turqi apo shtet tjetër. Por ti duhet të bindësh autoritetet shqiptare që ti je mjek”,– shton Brahimaj.
Kujtojmë se disa vite më parë, një pacient humbi jetën, për shkak se mjeku italian, i cili i ofronte kujdesin shëndetësor, e trajtonte atë me metoda tradiconale për sëmundjen e kancerit.
Prandaj, është e rëndësishme ndërhyrja e instancave përkatëse përgjegjëse që të vendosin para përgjegjësisë mjekët e palicensuar që po përhapen me shpejtësi në Shqipëri, duke rriskuar seriozisht jetën dhe shëndetin e qytetarëve shqiptarë.
