Mëngjesin e kësaj të enjteje kanë mbërritur në Shqipëri trupat e pajetë të 4 anëtërve të familjes Kola, të cilët humbën jetën tragjikisht më 4 shkurt në Porcari të Italisë si pasojë e asfiksimit nga monoksidi i karbonit. Babai, Arti Kola, 48-vjeç, nëna, Jonida Kola, 43-vjeçe, si dhe dy fëmijët e tyre, djali Hadjar Kola, 22-vjeç, dhe vajza Xhesika Kola, 15-vjeçe, do të prehen në fshatin Gryksh i Madh, në Peqin.
Katër anëtarët e familjes Kola nga fshati Gryksh i Madh, Peqin, u gjetën pa shenja jete në shtëpinë e tyre më 4 shkurt në Porcari, në provincën e Lucca-s, Itali.
Ngjarja e rëndë u shënua mbrëmjen e 4 shkurtit, e cila i mori jetën Arti Kolës, bashkëshortes së tij Jonida, 43 vjeçe, si dhe dy fëmijëve të tyre Hadjarit, 22 vjeç, dhe Xhesikës, 15 vjeçe. Të katërt humbën jetën nga monoksidi i karbonit i çliruar nga kaldaja e gazit e instaluar së fundmi në banesën ku jetonin.
Prokuroria e Luccas ka hapur një hetim për të zbardhur plotësisht rrethanat e ngjarjes dhe për të verifikuar përgjegjësitë e mundshme. Kaldaja rezulton të ketë qenë e re dhe dyshohet se ishte instaluar nga vetë pronari i banesës. Tashmë, pritet rezultati i analizave toksikologjike për katër viktimat, i cili pritet të jetë vendimtar për vijimin e hetimeve.
Dinamika
Në orën 9:46 të mbrëmjes, ambulancat mbërritën në derën e familjes Kola. Turim Kola, vëllai i kryefamiljarit dhe dy oficerë të karabinierisë u përpoqën të hynin në shtëpi, por nuk kishte oksigjen. Edhe ata u sëmurën. Ndërkohë, zjarrfikësit mbërritën në vendngjarje dhe siguruan ndërtesën. Megjithatë, ekipi i urgjencës mjekësore shpalli të vdekur Artin Kolën, gruan e tij Jonidën dhe fëmijët e tyre Hajdar dhe Xhesikë, të cilët u gjetën në dhomën e gjumit.
