Policia e Vlorës ka dhënë detaje lidhur me ngjarjen e rëndë të ndodhur në Qafën e Llogarasë, ku Artjon Xhelo, 27-vjeç u gjet i pajetë brenda një automjeti të djegur. Blutë sqarojnë se gjatë këqyrjes së mjetit, tip BMW, me targa AA 169 YX, në sediljen e drejtuesit u gjet trupi i pajetë i një personi, i djegur plotësisht dhe fillimisht i paidentifikuar.
Sipas njoftimit, nga këqyrja paraprake e automjetit dhe e trupit nuk janë konstatuar shenja të dukshme dhune apo dëmtime të shkaktuara nga faktorë të jashtëm, përveç atyre të shkaktuara nga zjarri. Nga verifikimet e kryera rezultoi se automjeti ishte në pronësi të Artjon Isa Xhelos, 27 vjeç, lindur dhe banues në Berat.
Ndërkohë sipas familjarëve, i riu kishte dalë nga banesa rreth orës 11:00 me automjetin BMV, pa bërë me dije destinacionin dhe nuk ishte kthyer më. Familjarët kanë pohuar gjithashtu se i riu vuante prej rreth tre vitesh nga ankthi dhe depresioni dhe ishte në trajtim mjekësor.
Gjithashtu sipas familjarëve, para se të largohej nga banesa u kishte deklaruar se nuk do të kthehej në shtëpi, nëse nuk do të gjente punë. Sakaq, trupi i pajetë është dërguar në morgun e Spitalit Rajonal të Vlorës, ku për identifikimin përfundimtar pritet përgjigjja e analizave biologjike (ADN).
Njoftimi i policisë:
Sot, më datë 15.12.2025, rreth orës 14:00, është marrë njoftim se në vendin e quajtur “Qafa e Llogarasë”, Vlorë, po digjej një automjet. Menjëherë në vendngjarje kanë shkuar shërbimet e Policisë, të cilat konstatuan se një automjet tip BMW, me targa AA 169 YX, ishte djegur plotësisht.
Nën drejtimin e Prokurorisë është ngritur grupi hetimor, i cili ka kryer veprimet e para hetimore. Gjatë këqyrjes së automjetit, në sediljen e drejtuesit të mjetit u gjet trupi i pajetë i një personi, i djegur plotësisht dhe ende i paidentifikuar. Nga këqyrja paraprake e automjetit dhe e trupit të pajetë nuk janë konstatuar shenja të dukshme dhune apo dëmtime të shkaktuara nga faktorë të jashtëm, përveç atyre të shkaktuara nga zjarri.
Nga verifikimet e kryera rezulton se automjeti është në pronësi të shtetasit Artjon Isa Xhelo, datëlindja 22.02.1998, lindur dhe banues në Berat. Sipas deklarimeve të familjarëve, ky shtetas rreth orës 11:00 ka dalë nga banesa e tij me automjetin në fjalë, pa bërë me dije destinacionin dhe nuk është kthyer më. Po sipas familjarëve, shtetasi vuante prej rreth tre vitesh nga ankthi dhe depresioni, për të cilat ishte në trajtim mjekësor.
Trupi i pajetë është dërguar në morgun e Spitalit Rajonal Vlorë, ku për identifikimin përfundimtar pritet përgjigjja e analizave biologjike (ADN). Nga hetimet e kryera deri në këtë fazë, dyshohet se kemi të bëjmë me një rast vetëvrasjeje, ndërsa, nën drejtimin e Prokurorisë, vijon puna hetimore për sqarimin e plotë të rrethanave dhe dinamikës së ngjarjes.
Marrë nga Dosja.al
