Të paktën 12 magjistratë të rinj të profilit prokuror mund të mbetën pa u emëruar në korrik të këtij viti për shkak të mungesës së vendeve të lira, ndërkohë që sistemi i Prokurorisë është thuajse i përgjysmuar për shkak të procesit të rivlerimit.
Ky paradoks u prezantua në mbledhjen e radhës të Këshillit të Lartë të Prokurorisë (KLP), e zhvilluar këtë të Martë (27 Janar 2025).
Sipas diskutimeve mes anëtarëve të KLP-së rezultoi se, në 1 Korrik 2025, do të duhet të emërohen 26 magjistratë të rinj, të cilët kanë përfunduar studimet në Shkollën e Magjistraturës dhe aktualisht po marrin pagë.
Sipas përcaktimeve të vendosura më herët, KLP-ja ka vendosur që magjistratët e rinj të emërohen në një prej prokurorive të shkallës së parë, përveç atyre të Tiranës, Durrësit dhe Elbasanit.
Këto tre struktura, si më të mëdhajat, janë konsideruar si “prokurori karriere” dhe vakancat e shumta të tyre do të duhet të plotësohen vetëm nëpërmjet “transferimeve”, një procedurë që, në një lloj mënyrë konsiderohet edhe si rritje në karrierë për prokurorët që ushtrojnë funksionet në rrethe të tjera.
Anëtarët e Këshillit të Lartë të Prokurorisë konstatuan se aktualisht, në 9 nga 12 prokuroritë e rretheve gjyqësore (përjashtuar Tirana, Durrësi dhe Elbasani), rezultojnë të jenë vetëm 14 vende vakante.
Pikërisht, këto vende pritet të plotësohen nga magjistratët e rinj që do të emërohen në 1 korrik të këtij viti. Por, llogaritë nuk dalin, të paktën për të gjithë listën e magjistratëve të rinj.
Ata janë në total 26, ndërkohë që vende vakante jashtë “prokurorive të karrierës” janë vetëm 14. Pra, 12 prej tyre rrezikojnë të mos marrin emërimin, pavarësisht se sistemi i Prokurorisë është në një situatë emergjente për staf.
Zgjidhja, sipas parashikeve të vetë rregullave të KLP-së, është procesi i transferimit të të paktën 12 prokurorëve aktualë që ushtrojnë detyrat në rrethe të ndryshme drejt prokurorive të Tiranës, Elbasanit e Durrësit, të cilat kanë mangësi në rreth 50 përqind të stafit të prokurorëve.
Kjo zgjidhje duket se do të jetë e vështirë për t’u realizuar brenda Korrikut 2025, për shkak të procedurave të ndërlikuara, të zgjatura në kohë dhe, herë pas here, edhe të neglizhuara nga Këshilli i Lartë i Prokurorisë.
Anëtarët e KLP-së që ngritën këtë paradoks, u shprehën skeptik se ky institucion do të kishte kohë të mjaftueshme për të kryer transferimet e prokurorëve të ndryshëm drejt Tiranës, Durrësit e Elbasanit në një periudhë 2-3 mujore.
Këshilli i Lartë i Prokurorisë ka shfaqur një sjellje shumë të vonuar në plotësimin e vakancave dhe procesin e transferimit të prokurorëve. Aktualisht, ky institucion është duke kryer proceset e vlerësimit të prokurorëve që kanë shprehur dëshirën për transferim, të cilët kanë aplikuar para 6 muajve apo më shumë.
Pikërisht, kjo rutinë me zvarritje të konsiderueshme kohore, rrezikon të pengojë emërimin e të paktën 12 magjistratëve të rinj, ndërkohë që secila prej njësive strukturore të sistemit të Prokurorisë është në emergjencë për staf prokurorësh prej disa vitesh.
Marre nga Boldnews.al
