Sondazhi i realizuar nga Këshilli Rajonal i Bashkëpunimit për Sigurinë në Ballkanin Perëndimor, e rendit Shqipërinë dukshëm si vendi më pro-NATO në gjithë rajonin.
Sipas të dhënave, 65% e qytetarëve shqiptarë e shohin NATO-n si garancinë kryesore për adresimin e sfidave të sigurisë, shumë më lart se çdo vend tjetër i rajonit. Pas saj renditet Kosova me 55%, ndërsa të tjerët shfaqin përqindje dukshëm më të ulëta, si Maqedonia e Veriut me 22% dhe Mali i Zi me 17%, ndërsa Serbia mbetet pothuajse e shkëputur nga ky orientim me vetëm 5%.
Ndërkohë, Shqipëria shfaq një orientim relativisht të ulët drejt Bashkimit Europian si mekanizëm sigurie, me vetëm 6% të qytetarëve që e konsiderojnë BE-në opsionin kryesor. Ky nivel është më i ulët krahasuar me fqinjët, ku Kosova arrin 15%, Mali i Zi 14% dhe Maqedonia e Veriut 18%, ndërsa mesatarja rajonale qëndron rreth 11%. Në të njëjtën linjë, shqiptarët pothuajse nuk e shohin të nevojshme një aleancë ushtarake me vende jashtë BE-së dhe NATO-s, duke shënuar vetëm 5%, shumë më poshtë se Serbia me 25% apo Bosnja dhe Hercegovina me 24%.
Ajo që e dallon Shqipërinë është hapja më e madhe drejt bashkëpunimit rajonal. Rreth 20% e qytetarëve e shohin këtë si një mekanizëm të vlefshëm sigurie, më shumë se shumë prej fqinjëve, përfshirë Kosovën me 16%, Bosnjën me 8% dhe Malin e Zi me vetëm 7%. Gjithsesi, Serbia renditet më lart me 25%, duke reflektuar një qasje më të fortë drejt aleancave brenda rajonit.
Neutraliteti është pothuajse i papranueshëm në Shqipëri, pasi vetëm 3% e qytetarëve e konsiderojnë atë si mekanizëm të përshtatshëm sigurie, një nivel shumë më i ulët se mesatarja rajonale prej 10% dhe larg Serbisë me 17% apo Malit të Zi me 15%.
Në tërësi, të dhënat tregojnë një profil të qartë të orientimit shqiptar: një besim i fortë dhe i qëndrueshëm ndaj NATO-s, në perceptimet e sigurisë dhe një prirje pozitive ndaj bashkëpunimit brenda rajonit.
Marrë nga Ekofin.al
