Protestë në formë marshimi është zhvilluar sot në Tiranë për 14-vjeçarin Martin Cani, i cili u godit me thikë për vdekje nga bashkëmoshatari i tij . Qindra qytetarë janë mbledhur në shkollën Fan Noli ku dhe ndodhi tragjedia dhe kanë nisur marshimin deri te ministria e Arsimit, ku dhe kanë mbajtur fjalën disa nga prindërit dhe shokët e viktimës.
Qytetarët kanë shprehur keqardhjen e tyre për ngjarjen e rëndë, ndërsa i kanë bërë apel organeve qeverisëse të marrin masa për parandalimin e ngjarjeve të tilla. Ata kanë kërkuar drejtësi për të miturin dhe siguri nga autoritetet në shkolla dhe në vend.
Një moment prekës në protestë ishte edhe mesazhi i mamasë së Martin Canit, i cili u lexuar nga një qytetare, në pamundësi që ajo të merrte pjesë. Florina Cani u shpreh se nuk ka fjalë për ta përshkruar dhimbjen dhe boshllëkun që iu ka lënë pas humbja e djalit të tyre. E ëma tregon se i mituri ishte plot ëndrra dhe jetë, ndërsa uron që askush mos ta provojë një dhimbje të tillë.
Ndërkohë të pranishëm në protestë kanë qenë disa familjarë të viktimës por që nuk kanë dhënë deklarata për mediat, përveç tezes së tij. Në gjendje të rënduar emocionale dhe psikologjike ajo ka kërkuar drejtësi për vrasjen e nipit të saj.
Organizatorët e protestës janë shprehur se do të protestojnë deri në përmbushjen e kërkesave të tyre, mes tyre ajo për dorëheqjen e ministres Ogerta Manastirliu. Ata kanë lajmëruar se ditën e hënë do të jenë sërish në protestë. Ndër kërkesat e qytetarëve, ka qenë edhe shtimi i punonjësve të sigurisë dhe psikologëve, nëpër shkolla.
