Shqipëria po përballet me një ndarje të fortë në tregun e punës, ndërsa qindra mijëra punonjës paguhen në kufijtë e minimumit, një kategori tjetër merr paga disa herë më të larta dhe e çon mesataren kombëtare në nivele që nuk përfaqësojnë shumicën.
Sipas INSTAT-it, paga mesatare mujore bruto arriti në 92.150 lekë gjatë tremujorit të dytë 2026, duke u rritur me 9,8% krahasuar me të njëjtën periudhë të vitit të kaluar. Por pas kësaj mesatareje fshihet një realitet shumë më i pabarabartë.
Plot 25,8% e të punësuarve marrin deri në pagën minimale prej 50 mijë lekësh. Kjo do të thotë se më shumë se një në katër punonjës duhet të përballojë ushqimin, qiranë, faturat dhe shpenzimet e familjes me të ardhura që mbeten shumë poshtë mesatares së publikuar.
Përveç tyre, 13,1% e punonjësve paguhen nga 50.001 deri në 60.000 lekë dhe 12,8% marrin nga 60.001 deri në 75.000 lekë.
Në total, 38,9% e të punësuarve nuk kalojnë pagën bruto prej 60 mijë lekësh, ndërsa 51,7%, ose më shumë se gjysma, marrin deri në 75 mijë lekë në muaj.
Në skajin tjetër ndodhen punonjësit me paga të larta. Pjesa e të punësuarve që marrin mbi 120 mijë lekë është rritur në 17,1%, nga 16,5% në tremujorin e parë të vitit.
Dallimi bëhet edhe më i fortë kur krahasohen sektorët. Në financa dhe sigurime, paga mesatare ka arritur në 187.267 lekë, më shumë se dyfishi i mesatares kombëtare dhe gati katërfishi i pagës minimale.
Në sektorin e informacionit dhe komunikacionit paga mesatare është 143.528 lekë. Këto janë të vetmet dy aktivitete ekonomike që rezultojnë mbi mesataren kombëtare.
Edhe pozicioni i punës krijon diferenca të mëdha. Menaxherët, ligjvënësit dhe drejtuesit ekzekutivë marrin mesatarisht 141.168 lekë, ndërsa specialistët me arsim të lartë paguhen 119.152 lekë.
Nga ana tjetër, sinjale për rritjen e kërkesës për fuqi punëtore vijnë nga ndërtimi, ku pagat janë rritur me 22,1% brenda një viti. Pagat e zejtarëve dhe artizanëve janë rritur me 16%, ndërsa ato të punëtorëve në profesionet elementare me 15,1%.
Megjithatë, paga mesatare prej 92.150 lekësh duhet lexuar me kujdes. Ajo është bruto dhe përfshin shpërblimet e shtesat mbi pagë, të cilat, sipas INSTAT-it, në fund të çdo gjashtëmujori e rrisin ndjeshëm mesataren statistikore.
Shifrat tregojnë dy realitete të ndryshme: Mbi gjysma e punonjësve paguhen deri në 75 mijë lekë bruto, ndërsa pagat e larta të një grupi më të kufizuar e ngrenë mesataren kombëtare në 92 mijë lekë. Për shumë familje paga mbetet në kufijtë e mbijetesës, ndërsa për një pjesë tjetër të tregut të punës të ardhurat janë disa herë më të larta.
Marrë nga Skyweb.al
