Tirana renditet ndër qytetet me nivelin më të ulët të cilësisë së kujdesit shëndetësor në Europë, sipas të dhënave të platformës ndërkombëtare Numbeo. Kryeqyteti shqiptar pozicionohet në vendin e 25-të nga 26 qytete të analizuara, me një indeks të kujdesit shëndetësor prej vetëm 47.3, duke lënë pas vetëm Banja Lukën, e cila ka një indeks prej 46.1.
Diferenca me qytetet kryesore të Europës është shumë e theksuar. Madridi renditet në vendin e parë me një indeks prej 79.2, i ndjekur nga Porto me 78.8, Valencia me 77.7 dhe Barcelona me 76.7, çka tregon një nivel shumë më të lartë të cilësisë dhe aksesit në shërbimet shëndetësore krahasuar me Tiranën. Edhe qytete si Bolonja me 76.1, Lisbona me 72.4 dhe Milano me 70.2 paraqesin një avantazh të konsiderueshëm ndaj kryeqytetit shqiptar.
Në rajon, Tirana mbetet gjithashtu në nivele më të ulëta. Zagrebi ka një indeks prej 64.9, Ljubljana 66.6, ndërsa Spliti 68.4. Edhe Sarajeva, me 59.1, Athina me 58.5 dhe Selaniku me 57.5, qëndrojnë dukshëm mbi nivelin e Tiranës. Në të njëjtën kohë, Shkupi ka një indeks prej 55.0, Beogradi 53.1 dhe Novi Sadi 50.2, duke treguar se edhe këto qytete të Ballkanit ofrojnë, sipas perceptimit të Numbeo, një nivel më të lartë të kujdesit shëndetësor.
Pozicioni i ulët i Tiranës reflekton sfidat e vazhdueshme të sistemit shëndetësor shqiptar, i cili përballet me kufizime në financim, infrastrukturë dhe burime njerëzore. Shqipëria shpenzon më pak për shëndetësinë në raport me Prodhimin e Brendshëm Bruto krahasuar me shumicën e vendeve europiane, ndërsa sistemi publik përballet me mungesa të stafit dhe emigrimin e vazhdueshëm të mjekëve dhe infermierëve drejt vendeve të Bashkimit Evropian.
Në vitet e fundit, sektori privat i shëndetësisë është zgjeruar ndjeshëm, veçanërisht në Tiranë, duke ofruar shërbime më moderne dhe më të shpejta, por shpesh me kosto të lartë për qytetarët. Kjo ka krijuar një diferencë të ndjeshme mes atyre që mund të përballojnë shërbime private dhe pjesës tjetër të popullsisë që mbështetet kryesisht në sistemin publik.
Indeksi i ulët i Numbeo pasqyron jo vetëm cilësinë e perceptuar të shërbimeve, por edhe besimin e qytetarëve tek sistemi shëndetësor, kohën e pritjes, aksesin në trajtim dhe infrastrukturën në dispozicion. Renditja e Tiranës në fund të listës evropiane tregon se, pavarësisht përmirësimeve të viteve të fundit dhe investimeve në disa spitale dhe klinika, sistemi shëndetësor shqiptar mbetet ende larg standardeve të shumicës së vendeve të rajonit dhe Evropës.
Marrë nga Ekofin.al
