Gianmarco Tamberi garon në kërcim së larti, në këto Lojëra Olimpike. Ai është kampion aktual olimpik, kampion evropian dhe kampion bote.
Në nisje të këtyre lojërave olimpike, u bë lajmi në faqe të para të gazetave për një arsye, që nuk lidhej aspak me performancën e tij sportive.
Teksa Tamberi valëvitte me entuziazëm flamurin italian, ai papritmas kuptoi se kishte humbur unazën e tij të martesës, e cila me sa duket i ra në lumin Seine.
“Më vjen keq dashuria ime, më vjen shumë keq”, shkroi ai më vonë në Instagram, krahas fotove të tij dhe gruas së tij.
“Do të mbetet përgjithmonë në shtratin e lumit të qytetit të dashurisë.”
Fatmirësisht për Tamberin, bashkëshortja e tij e ka marrë me sportivitet. “Vetëm ti mund ta kthesh diçka të tillë në diçka romantike”, komentoi ajo në postimin e tij.
Fakt argëtues: Tamberi e ka zakon të bëjë bujë në Lojërat Olimpike. Gjatë Lojërave të Tokios, ai u bë kryefjalë pasi medaljen e ndau së bashku me Mutaz Essa Barshim të Katarit.
