Këtë të mërkurë në orën 21:00 në “Olimpico” Të Romës do luhet finalja e Kupës së Italisë mes Milanit dhe Bolognas. Kuqezinjtë e Çonceiçaos kërkojnë titullin e gjashtë në Kupë, ndërsa kuqeblutë e Italianos atë të tretë në histori.
Rrugëtimi – Milani i udhëhequr nga Sergio Conceiçao ka treguar një formë të paqëndrueshme në ligë, por ka shkëlqyer në Kupën e Italisë. Pasi mposhtën Sassuolon me rezultatin e pastër 6-1 dhe Romën 3-1, kuqezinjtë eliminuan Interin në gjysmëfinale, duke demonstruar karakter dhe vendosmëri. Fitorja e fundit 3-1 në Serie A ndaj Bolognas i ka rritur vetëbesimin ekipit përpara finales.
Në anën tjetër, Bologna nën drejtimin e Vincenzo Italianos arriti në finalen e Kupës së Italisë për herë të parë që nga viti 1974. Pasi eliminuan Monzën me rezultatin bindës 4-0 dhe Atalantën 1-0, kuqezinjtë mposhtën Empolin në gjysmëfinale, duke fituar si ndeshjen e parë ashtu edhe atë të dytë. Ekipi emilian ëndërron të thyejë një agjërim 51-vjeçar dhe ta dërgojë trofeun përsëri në Bologna.
