Protestuesi Erlis Sina ka reaguar pasi kryeministri Edi Rama publikoi fotografinë e tij në një postim të gjatë në rrjetet sociale kushtuar protestës qytetare para Kryeministrisë. Përmes një reagimi publik, Sina akuzoi kryeministrin se po përpiqet të zhvendosë vëmendjen nga arsyet reale që, sipas tij, kanë nxjerrë qytetarët në protestë.
Ai argumentoi se pjesëmarrësit në tubime nuk janë të manipuluar nga algoritmet, influencerët apo forcat politike. Sipas Sinë ata protestojnë për shkak të problemeve të përditshme me të cilat përballen, si vështirësitë ekonomike, shërbimet publike, papunësia dhe largimi i të rinjve nga vendi.
Në reagimin e tij, Sina e konsideroi qeverinë përgjegjëse për shumë prej shqetësimeve që kanë nxitur revoltën qytetare dhe akuzoi Ramën se po minimizon pakënaqësinë e qytetarëve duke e paraqitur atë si produkt të ndikimeve në rrjetet sociale.
Ai i kërkoi gjithashtu kryeministrit të mos përdorë fotografinë e tij për të justifikuar apo relativizuar problemet që kanë shtyrë mijëra qytetarë të dalin në shesh.
Reagimi erdhi pasi mëngjesin e së martës Edi Rama publikoi një status të gjatë në rrjetet sociale, të shoqëruar me fotografinë e Sinës të ulur në shkallët e Kryeministrisë. Në postimin e tij, kreu i qeverisë ironizonte duke thënë se protestuesit janë shndërruar në “proletariatin e algoritmit”.
Marrë nga Lapsi.al
