Një anije kozmike kineze me një ekuipazh prej tre personash, duke përfshirë inxhinieren e parë grua të hapësirës në vend, është ankoruar pas një udhëtimi prej më shumë se gjashtë orësh.
Pekini e deklaroi nisjen e Shenzhou 19 një “sukses të plotë”. Ky është një nga 100 lëshimet që Kina ka planifikuar në një vit rekord të eksplorimit të hapësirës, ndërsa përpiqet të kalojë rivalin e saj, Shtetet e Bashkuara.
Flakët dolën nga raketahedhësi teksa u ngrit në qiell, duke ndezur shkretëtirën Gobi me një zhurmë shurdhuese. Qindra njerëz u rreshtuan në rrugë, duke brohoritur emrat e taikonautëve, sikurse kinezët quajnë astronautët.
Në stacionin hapësinor Tiangong, ekuipazhi i Shenzhou 19 u takua me tre astronautë të tjerë të cilët po drejtojnë Shenzhou 18 dhe do të kthehen në Tokë më 4 nëntor.
Vetëm dy vjet më parë, Presidenti Xi Jinping deklaroi se “të eksplorojmë kozmosin e gjerë, të zhvillojmë industrinë hapësinore dhe ta ndërtojmë Kinën në një fuqi hapësinore është ëndrra jonë e përjetshme”.
Por disa në Uashington e shohin ambicien e vendit dhe përparimin e shpejtë si një kërcënim real.
Në fillim të këtij viti, shefi i NASA-s, Bill Nelson, tha se SHBA-ja dhe Kina ishin “në një garë” për t’u rikthyer në Hënë, ku ai ka frikë se Pekini dëshiron të ketë pretendime territoriale.
