Ministri i Brendshëm Ervin Hoxha ka deklaruar se është zbardhur atentati në Dobraç të Shkodrës. Nga masakra e Dobraçit kanë humbur jetën Arlind Bushati, Hamza Lici si dhe dy qytetarë të pafajshëm. Nga Korça, Hoxha theksoi se së shpejti Policia e Shtetit do të dalë në një deklaratë për shtyp, për të nxjerr detajet nga ngjarja. Po ashtu ministri Hoxha tha se emrat e implikuar në ngjarjen e Dobraçit do të publikohen në deklaratën që do të jap policia.
“ Gjithashtu, janë zhvilluar kontrolle, ndalime dhe shoqërime të personave të përfshirë në ngjarje të rënda kriminale, përfshirë ato në Shkodër. Për emrat, besoj se duhet të presim deklaratat e Policisë së Shtetit, që do t’i bëjnë të ditura shumë shpejt. Unë besoj se shumë shpejt Policia e Shtetit do të publikojë deklarata konkrete për sa i përket emrave të përfshirë në ngjarjet në Dobraç,” tha ministri Hoxha.
Ngjarja ndodhi disa javë më parë në Dobraç të Shkodrës, ku në rrugën kryesore që lidh qytetin me Malësinë e Madhe, të paktën një automjet i ka prerë rrugën një “Mercedes”-i duke qëllua me breshëri kallashnikovi mbi të. Viktimat janë Hamza Lici që vdiq në vendin e ngjarjes, Arlind Bushati i cili nërroi jetë në spital, Flutura Basha e cila ishte një kalimtare e rastit në atë rrugë dhe bashkëshorti i saj Bashkim Basha. Në makinën e viktimave shofer ka qenë Hamza Lici dhe pasagjer Arlind Bushati. Lici ka humbur kontrollin e makinës duke marrë para dhe motorin në të cilin ndodhej çifti Basha.
