Ish-drejtori i Përgjithshëm i Policisë së Shtetit dhe tashmë kreu i kompanisë shqiptare të prodhimit të armëve, Ardi Veliu do të ketë një detyrë të re. Ai është caktuar si koordinator elektoral në Vlorë për të mbledhur vota.
Mësohet se pak ditë më parë, Ardi Veliu është prezantuar nga ministri Pirro Vëngu si pjesë e shtabit elektoral të Partisë Socialiste në Qarkun e Vlorë, për t’u angazhuar në zgjedhjet e 11 Majit 2025.
Prezantimin e Veliut e ka bërë vetë ministri Pirro Vëngu në takim me organizatat socialiste. Reagimi i parë kundër këtij vendimi ka ardhur nga Partia e Lirisë, përmes politikanes Silva Caka.
“Ardi Veliu, qejfliu i mishit të derrit të zi, që bënte gjoja si drejtor apolitik i Policisë së Shtetit, sapo u emërua koordinator elektoral në Vlorë, i partisë në pushtet”, shkruan ajo.
Ardi Veliu ka mbajtur më parë detyra si drejtor i Agjencisë së Mbikëqyrjes Policore, drejtor i Përgjithshëm i Policisë së Shtetit dhe tashmë është në krye të kompanisë së krijuar pak muaj më parë për prodhimin e armëve, “KAYO”.
Ai u emërua drejtor në shkurt të vitit 2018 ndërsa drejtimi i Policisë së Shtetit prej tij u shoqërua me akuza për instrumentalizim partiak të kësaj strukture. Ardi Veliu ishte gjithashtu drejtori që pa degradimin e marrëdhënieve mes qytetarëve dhe Policisë së Shtetit në përplasje të dhunshme.
Gjatë katër viteve të drejtimit të tij, Policia e Shtetit rrëshqiti gjithnjë e më shumë drejt një strukture propartiake, duke shënuar kulmin pak para zgjedhjeve të 25 prillit.
Marrë nga Newsbomb.al
