Koorporata Shqiptare e Investimeve njoftoi se, ka shtyrë afatin për shprehje interesi nga partnerë privatë potencialë që duan të paraqesin ofertë për të zhvilluar projektet mbi pronat shtetërore.
Në faqen e saj zyrtare Korporata bëri me dije se afati i parë i përcaktuar në 6 janar 2025 tashmë është zëvendësuar me atë 20 janar 2025. Aktualisht janë në proces shprehje interesi për partneritet dy projekte. I pari është nënprojekti “Ndërtimi dhe menaxhimi i godinës së Kadastrës Shqiptare” me kontratën që ka në objekt “Zhvillimi nëpërmjet sipërmarrjes i LIFT Tower”.
“Korporata nëpërmjet kësaj procedure konkurruese publike ndërkombëtare synon të përzgjedhë partnerin privat, në cilësinë e Sipërmarrësit për zhvillimin e pronës për sipërmarrje, duke realizuar projekt-idenë arkitekturore të bashkimit të subjekteve Baukuh Studio Associato & Muoto & Sam Chermayeff Office & Yellow Office & Bollinger Grohmann & Atmoslab & Simoj Boudvin & Arkimade” thuhet në njoftimin e Korporatës.
Nënprojekti i dytë për të cilët kompanitë private mund të shprehin interes për të hyrë në partneritet me Korporatën është ai “Ndërtimi dhe menaxhimi i Kompleksit Governativ” me objekt kontrate “Zhvillimi nëpërmjet sipërmarrjes i VOID Tower”.
“Korporata nëpërmjet kësaj procedure konkurruese publike ndërkombëtare synon të përzgjedhë partnerin privat, në cilësinë e Sipërmarrësit për zhvillimin e pronës për sipërmarrje, duke realizuar projekt-idenë arkitekturore të bashkimit të subjekteve Andrea Kaputo & Focus Architecture & OpenFabric & James Beckett”, thuhet në njoftim.
“Me vendimin VKM 328/2024, Këshilli i Ministrave me aktin e transferimit të disa pronave në pronësi të Korporatës dhe disa pronave të tjera me të drejta zhvillimi, vendosi si kusht për transferimin e pronës plotësimin e nevojave të institucioneve publike sipas termave të marrëveshjeve të bashkëpunimi, terma të cilat ishin baza e hapjes së konkursit të projektimit të projekt-idesë së projektimit pjesë e kësaj procedure konkurruese lidhur me ndërtimin e Kompleksit Governativ në zonën urbane pranë stadiumit “Selman Stermasi” në një truall rreth 11,892 m2 dhe VOID Toëer në zonën urbane në bulevardin “Zhan d’Ark” thuhet në dokumentet e Korporatës lidhur me procedurën.
Në këtë kontekst privati do të zhvillojë ndërtimin tek Aviacioni Civil dhe Parku i Delegacioneve dhe njëkohësisht edhe ndërtimin në Bulevardin Zhan d’Ark.
Korporata Shqiptare e Investimeve ka specifikuar kushtet që duhet të plotësojnë kompanitë që shprehin interes për të hyrë në marrëveshje partneriteti me këtë të fundit teksa nënvizon se aspekti kryesor që u jep avantazh kompanive është përqindja më e lartë e sipërfaqes që ofrohet për llogari të shtetit.
Marrë nga Monitor
