Deputeti i Partisë Socialiste, Pandeli Majko zhvilloi sot një takim me Kryetaren e Kuvendit të Shqipërisë, Elisa Spiropali, pas akuzave të ngritura ndaj tij nga kryetari i Partisë Demokratike, Sali Berisha.
Majko bëri të ditur se i ka kërkuar Kryetares së Kuvendit që brenda protokolleve në fuqi, t’i kërkojë Shërbimit Informativ Kombëtar informacion me shkrim, lidhur me aludimet për fshehje informacioni, të deklaruar dje në publik nga Sali Berisha.
“Kam vendosur që të dorëzoj çdo imunitet parlamentar, i cili mund të jenë i nevojshëm për hetimin e çështjes së ngritur për emrin tim në deklarimet publike të Sali Berishës”, u shpreh Majko.
Në një komunikim me mediet dje, Berisha e konsideroi Majkon si “kriminelin më të madh elektoral në Kukës”, ndërsa pretendoi se “Majko u përgjua me vendim gjykate duke bërë pazare në tavolinë”.
“Pandeli Majko është i regjistruar në tavolinë me regjistrues, të vendosur me vendim gjykate nga Shërbimi Informativ Kombëtar, jo për Pandeli Majkon, por për trafikantë droge dhe armësh që mblidheshin aty”, u shpreh dje Berisha.
Marrë nga Ata.gov.al
