Temperaturat në kryeqytetin amerikan Uashington janë prej disa ditësh nën zero dhe moti në inaugurimin e Donald Trump të hënën mund të jetë më i ftohti që ka qenë në ndonjë ceremoni të tillë në dekada.
Ndërsa nuk pritet të jetë aq i ftohtë sa kur Ronald Reagan u betua për herë të dytë në vitin 1985, kur temperatura e mesditës ishte -14°C, sipas Shërbimit Amerikan të Motit (NWS), vlera maksimale e së hënës parashikohet të jetë -6° Celsius.
Tradicionalisht, betimi mbahet jashtë në anën perëndimore të Kapitolit federal. Sipas të dhënave të NWS, temperatura e lartë “e zakonshme” në ditën e inaugurimit të presidentit aktual të SHBA është 7°C dhe ajo e ulëta është -1°C. Në mesditë është përgjithësisht rreth 3° Celsius.
Për shumë nga të ftuarit, ky nuk është tamam një lajm i mirë, ata duhet të kenë zënë vendet e tyre shumë kohë përpara se të fillojë betimi. Donald Trump ka pyetur me sarkazëm në të kaluarën, në rastet e dallgëve të ftohta, se çfarë ndodhi me atë ngrohje globale.
Për shkak të temperaturës jashtëzakonisht të ulët në vitin 1985, është preferuar që ceremonia e betimit të mbahet në ambiente të mbyllura. Ajo u zhvillua në Rotunda, një dhomë e Kapitolit. Kjo ishte temperatura më e ftohtë për çdo ditë inaugurimi presidencial që nga fillimi i regjistrimeve në 1871, sipas NWS.
Marrë nga Associated Press
