Zëdhënësi i KQZ-së, Valmir Elezi ka bërë të ditur se gjatë mbrëmjes së djeshme, në Komisionin Qendror të Zgjedhjeve janë sjellë 36 mijë e 500 pako me fletëvotime të cilat siç tha ai, i takojnë procesit të votimit përmes postës në kutitë postare të KQZ-së jashtë Kosovës, nga Gjermania dhe Zvicra.
Elezi tha se fillimisht këto pako me fletëvotime i nënshtrohen procesit të vlerësimit.
“Sipas procedurave, fillimisht këto pako me fletëvotime i nënshtrohen procesit të vlerësimit, i cili përfshinë verifikimin nëse ato u takojnë votuesve të regjistruar dhe nëse janë ndjekur procedurat tjera të parapara, ndërkaq numërimi i këtyre fletëvotimeve do të bëhet në një fazë të mëvonshme në Qendrën e Numërimit dhe Rezultateve, pas ditës së zgjedhjeve”, deklaroi ai.
Zëdhënësi i KQZ-së gjithashtu tha se procesi i vlerësimit të dërgesave postare do të mund të vëzhgohet nga vëzhgues të akredituar nga KQZ-ja, të cilët siç tha ai, do të njoftohen me kohë.
“Aktualisht, është duke u zhvilluar periudha e votimit përmes postës, e cila vlen vetëm për shtetasit që gjatë regjistrimit si votues jashtë Kosovës janë përcaktuar individualisht për mënyrën e votimit (1) duke dërguar fletëvotimin përmes postës në një nga kutitë postare të hapura nga KQZ jashtë Kosovës, apo (2) duke dërguar fletëvotimin përmes postës në kutinë postare të KQZ-së në Kosovë. Kjo periudhë votimi ka filluar më 9 janar dhe do të përfundojë më 8 shkurt 2025”, tha tutje Elezi.
KQZ, në një njoftim për media të djeshëm, tha se tërheqja e dërgesave postare nga kutitë postare të Komisionit, si dhe dërgimi i materialeve zgjedhore në përfaqësi diplomatike, do të bëhet përmes rrugëve tokësore nga zyrtarët e KQZ-së, me ndihmën e Ministrisë së Punëve të Jashtme dhe Diasporës.
MPJD, sipas KQZ-së, “ka siguruar automjetet transportuese, të cilat do të drejtohen nga zyrtarët e saj”.
Ky vendim për këtë mënyrë transportimi, sipas KQZ-së, është marrë pasi procedura tenderuese për shërbimet postare është në fazën e ankesave, gjë që e ka bërë të pamundur nënshkrimin e kontratës me operatorin ekonomik fitues.
Marrë nga Klan Kosova
