Kryeministri francez, François Bayrou, ka arritur t’i shpëtojë një mocioni mosbesimi të iniciuar nga e majta radikale, pasi as Fronti Kombëtar i ekstremit të djathtë dhe as Socialistët e qendrës së majtë nuk e mbështetën përpjekjen për ta rrëzuar atë.
Nga 128 deputetë që votuan pro mocionit, numri ishte larg pragut prej 289 votash të nevojshme për ta rrëzuar qeverinë.
Partia e së majtës ekstreme, Të Papërkulurit, kishte dorëzuar dy mocione mosbesimi si kundërpërgjigje ndaj vendimit të Bayrou për të përdorur nenin 49.3 të kushtetutës, i cili i lejon qeverisë të miratojë ligje pa votën e parlamentit, në këtë rast për buxhetin vjetor.
Refuzimi i Partisë Socialiste për ta mbështetur mocionin ka shkaktuar pakënaqësi te partnerët e saj të koalicionit të Frontit të Ri Popullor, duke rrezikuar unitetin e aleancës që arriti rezultate të mira në zgjedhjet e fundit.
Lideri i së majtës radikale, Jean-Luc Mélenchon, e komentoi këtë zhvillim si fundin e koalicionit, duke deklaruar se “Fronti i Ri Popullor ka një parti më pak.”
Marrë nga AFP
