Raundi i parë i bisedimeve mes zyrtarëve amerikanë dhe rusë në Arabinë Saudite tashmë ka përfunduar.
Ndihmësi i Kremlinit, Yuri Ushakov tha se, negociatat “shkuan mirë” me kushtet për një takim midis Donald Trump dhe Vladimir Putin duke u diskutuar, por asnjë datë nuk u dakordësua mes palëve.
Bisedimet zgjatën katër orë e gjysmë, me Ushakov që tha se negociatorët kanë rënë dakord me SHBA-në për të diskutuar luftën në Ukrainë.
Nga ana tjetër Departamenti i Shtetit tha se sekretari amerikan i shtetit Marco Rubio ra dakord me zyrtarët rusë për të krijuar një “mekanizëm konsultimi për të adresuar problematikat në marrëdhëniet SHBA-Rusi”.
DASH shtoi se Rubio dhe Sergei Lavrov ranë dakord të caktojnë ekipe të nivelit të lartë për të filluar punën në një rrugë për t’i dhënë fund luftës në Ukrainë sa më shpejt të jetë e mundur.
Nga ana tjetër, Ukraina, e cila nuk ka qenë pjesë e tryezës në Riad, po bën lëvizjet e saj. Presidenti Volodymyr Zelensky ndodhet në kryeqytetin turk, Ankara. Kjo është vizita e tij e tretë në vend që nga pushtimi i plotë i Ukrainës nga Rusia pothuajse tre vjet më parë.
Ai do të takohet më vonë me Presidentin Recep Tayyip Erdogan, me të cilin do të mbajnë një konferencë të përbashkët për shtyp në orën 13:00 GMT (16:00 sipas kohës lokale).
Ai gjithashtu ka marrë pjesë në një ceremoni për hapjen e një ndërtese të ambasadës ukrainase, së bashku me gruan e tij, Olena Zelenska.
