Qyteti i Librazhdit pa energji elektrike

Qyteti i Librazhdit gjatë kësaj të enjteje do të jetë pa energji elektrike.

Burime zyrtare informuan se shkak  i ndërprerjes së energjisë është ndërhyrja e detyruar e specialistëve për kryerjen e punimeve në Nënstacionin elektrik 110 kv të Librazhdit.

Ky nënstacion është një investim i kryer pak kohë më parë  nga OST në bashkëpunim me OSHEE. Investimi prej 1 milion euro u realizua  për demontimin dhe rikonstruksionin e dy trakteve dalës të linjave Librazhd – Fibër dhe Librazhd – Përrenjas me pajisje totalisht të reja, përmirësimin e skemës elektrike.

Ky investim mundëson një operim më të shpejtë dhe më të sigurt të këtij nënstacioni nga ana e personelit operativ dhe nga ky investim në bashkinë e Librazhdit përfitojnë të paktën 11 mijë abonentë.