Jo vetëm mandarinat. Kroacia ka ndaluar në kufi edhe një ngarkesë me speca të nisura nga Shqipëria, të klasifikuara si produkt me rrezik të lartë për konsumatorët.
Më datë 12 mars, përmes sistemit të alarmeve të shpejta të BE-së (RASFF), në Kroaci është kapur një ngarkesë me speca nga Shqipëria, me përmbajtje shumë të lartë pesticidesh – të klasifikuara me rrezik të lartë për konsumatorin. Për RAFSS, njoftimi i dhënë në kufi është klasifikuar si shqetësim serioz.
Pas analizave të kryera nga pala kroate ka rezultuar se specat kanë patur prani të tepërt “flonicamidi”.
Flonicamidi është një insekticid që përdoret në fushë dhe në serra. Ka një tretshmëri të lartë në ujë dhe një paqëndrueshmëri të ulët. Ai përdoret kundër dëmtuesve hemipterous, si afidet dhe mizat e bardha, dhe dëmtuesit tizanopterë. Pesticidi ka një toksicitet të moderuar tek gjitarët (në këtë kategori futen njerëzit) dhe mund të jetë helmues për mëlçitë dhe veshkat.
Por edhe pse lajmërimi me “alarm të kuq” është dhënë nga Rapid Alert System for Food and Feed (RASFF), Autoriteti Kombëtari i Ushqimit dhe Ministria e Bujqësisë nuk kanë dhënë asnjë njoftim zyrtar.
Megjithëse ka kaluar një muaj nga kthimi i ngarkesës me specat helmues nuk dihet se ku kanë përfunduar ato.
Shqipëria ka një rekord shumë problematik me ushqimet që kthehen nga vendet e tjera për prani helmesh apo pesticidesh të palejuara. Pak muaj më parë, një ngarkesë me mandarina e kthyer po nga Kroacia për përmbajtje pesticidesh të palejuara, u rishit në tregun shqiptar.
Marrë nga Syri.net
