Ditën e djeshme kanë hyrë në fuqi disa ndryshime të rëndësishme në skemën e kreditimit studentor. Në datën 4 prill 2025, Këshilli i Ministrave miratoi këto ndryshime në vendimin nr. 440, datë 19.7.2023, të titulluar “Për përcaktimin e skemës së kreditimit studentor”.
Këto ndryshime synojnë përmirësimin e kushteve dhe lehtësimin e procedurave për marrjen e kredive studentore, duke u ofruar mundësi më të mira studentëve, të cilët kanë nevojë për mbështetje financiare gjatë studimeve të tyre në arsimin e lartë. Ndryshimet kryesore në vendim përfshijnë disa fusha, duke nisur nga afati i aplikimit për kredi studentore te kriteret e financimi i kredive studentore me këste. Afati për aplikimin për kredi është ndryshuar.
Fjalët “brenda muajit janar” janë zëvendësuar me “përpara fillimit të vitit akademik”, duke u mundësuar kështu studentëve që të aplikojnë për kredi në një periudhë më fleksibël, e cila i përshtatet më mirë fillimit të çdo viti akademik. Financimi i kredive studentore do të realizohet me këste, të paktën dy herë në vit. Kësti i parë do të paguhet pas konfirmimit nga institucioni i arsimit të lartë, që studenti ka frekuentuar procesin mësimor për vitin akademik përkatës. Këstet pasardhëse financohen vetëm pasi studenti të ketë shlyer tarifën vjetore të shkollimit dhe të ketë frekuentuar mësimin. Shlyerja e kredive mund të bëhet jo më herët se koha e caktuar për përfundimin e studimeve, megjithatë, me kërkesën e studentit, mund të mundësohet edhe shlyerja përpara përfundimit të periudhës normale të studimeve, duke i dhënë më shumë mundësi fleksibiliteti studentëve.
Sipas ndryshimeve, mbulimi i interesave të kredive studentore do të realizohet nga fonde buxhetore që do të akordohen nga ministria përgjegjëse për arsimin. Në këtë mënyrë, do të mundësohet që studentët të përfitojnë kredinë pa pasur barrë të rëndë për interesat, pasi ato do të mbulohen nga buxheti i shtetit. Shuma e fondeve për mbulimin e interesave të kredive studentore do të përllogaritet deri në 0.5% të shumës vjetore të grantit të mësimdhënies. Ky vendim hyn në fuqi pas botimit në Fletoren Zyrtare dhe është një hap i rëndësishëm për përmirësimin e sistemit të mbështetjes financiare për studentët.
Afati i aplikimit për kredi studentore
Financimi dhe shlyerja e kredive Kriteret për aplikimin për kredi studentore
Afatet e shqyrtimit të kërkesave Rregullimet për shlyerjen e kredive
Mbështetje financiare për interesat e kredive.
Marrë nga Gazetadita.al
