Rruga dytësore e Liqenit të Thatë do të rehabilitohet së shpejti, pasi Bashkia e Tiranës ka shpallur një tender me vlerë 1.2 miliardë lekë. Bëhet fjalë për gjurmën ekzistuese të rrugës, e cila fillon nga Kopshti Zoologjik i Tiranës, aty ku mbaron rruga “Shyqyri Brari”, deri te rrethrrotullimi i rrugës “Hiqmet Buzi”.
Referuar të dhënave publike në Agjencinë e Prokurimeve, tenderi është shpallur këtë të enjte datë 5 Qershor dhe të gjitha kompanitë e interesuara kanë afat pesëmbëdhjetë ditë për të dorëzuar ofertat e tyre.
Gjendja ekzistuese e rrugës është jo shumë e keqe, siç thuhet dhe në relacionin e Bashkisë së Tiranës, por pjesa e shtruar me asfalt është pjesërisht e dëmtuar me çedime dhe gropa në gjithë gjatësinë e saj, ndaj kërkohet ndërhyrja.
Institucioni i drejtuar tashmë nga Anuela Ristani, ka vendosur që të japë 122 milionë lekë të reja ose 1.2 miliardë lekë të vjetra për një rrugë me gjatësi 1.15 kilometra dhe gjerësi 6 metra.
“Rruga e “Liqenit te Thate” fillon nga kopshti zoologjik i Tiranes, aty ku mbaron rruga “Shyqyri Brari” deri te rrethrrotullimi i rruges “Hiqmet Buzi”. Shtresat ekzistuese jane te amortizuara, vende vende jane krijuar dhe gropa per shkak te demtimit”, thuhet në realacionin argumentues.
