Të paktën shtatë persona kanë humbur jetën dhe dhjetëra të tjerë janë plagosur në një seri sulmesh të koordinuara në jugperëndim të Kolumbisë, raportojnë mediat lokale.
Sipas Ministrisë së Mbrojtjes së Kolumbisë, janë regjistruar gjithsej 19 sulme: 12 në rajonin Cauca dhe shtatë në Valle del Cauca. Dy oficerë policie janë midis viktimave, ndërkohë që numri i të plagosurve varion nga 28 në mbi 50 persona, sipas burimeve nga Reuters dhe AFP.
Në një deklaratë në rrjetet sociale, Ministria e Mbrojtjes përshkroi dhunën si “një reagim të dëshpëruar nga grupet e armatosura ilegale ndaj operacioneve të gjera ushtarake dhe policore që kanë goditur strukturat dhe ekonomitë e tyre të paligjshme”.
Kryebashkiaku i Calit tha se situata e sigurisë në qytet i kujton vitet e errëta të 1989-ës, kur qyteti ishte i zhytur në dhunë për shkak të karteleve të drogës.
Marrë nga Reuters
