Gjatë ditëve të fundit parti politike dhe media kanë publikuar pamje filmike dhe denoncime mbi raste të shkeljes së Kodit Zgjedhor gjatë votimit dhe administrimit të rezultatit zgjedhor të 11 majit 2025. Pavarësisht motiveve politike disa denoncime ofrojnë disa të dhëna faktike. Gjithashtu procesi i rinumërimit të pjesshëm të votave në zona të caktuara ka dëshmuar deformime në votave në favor të kandidatëve brenda subjekteve politike ose jashtë midis tyre.
Nëse rezultojnë të vërteta, praktika të tilla janë akte në kundërshtim me standardet dhe legjislacionin zgjedhor, përbëjnë shkelje flagrante dhe akte penale. Ajo përbëjnë edhe një krim kundër votës dhe vlerave të demokracisë që promovojmë përmes zgjedhjeve.
Bazuar në këto të dhëna, Instituti i Studimeve Politike (ISP), organizatë e cila po monitoron integritetin e kandidatëve, partive dhe standardet e procesit zgjedhor 2025:
I. i bën thirrje KQZ të denoncojnë zyrtarisht çdo nëpunës zgjedhor, komisioner apo anëtar të grupeve të numërimit të votave që rezulton se ka shkelur ligjin
II. i bën thirrje Prokurorive së juridiksionit të përgjithshëm të hetojë çdo të dhënë të bërë publike që mund të rezultojë bazë gjykimi në listën e krimeve zgjedhore
III. i bën thirrje SPAK të hetojë rastet ku janë përfshirë zyrtarë dhe që përbëjnë krime zgjedhore të kategorisë për të cilën ky institucion është përgjegjës.
Shqipëria është në proces anëtarësimi në BE, ndaj ajo meriton zgjedhje me integritet dhe standarde të krahasueshme me vendet anëtare të BE-së. Cilido individ/zyrtar/subjekt/institucion që ka cenuar apo deformuar votën gjatë fushatës elektorale, gjatë votimit, gjatë numërimit, apo gjatë administrimit të procesit meriton përballje me pasojat ligjore dhe administrative. Krimi zgjedhor nuk mund të justifikohet dhe as amnistohet.
Marrë nga Newsbomb.al
