Vatra e zjarrit në vendgrumbullimin e mbetjeve urbane në zonën e Myç-Mamëzit, pranë qytetit të Kukësit, vijon të jetë aktive prej 24 orësh.
Për shuarjen e zjarrit janë angazhuar dy automjete zjarrfikëse me 10 efektivë, si dhe një fadromë, një eskavator dhe katër kamionë të Drejtorisë së Shërbimeve të Bashkisë Kukës.
Autoritetet lokale ende nuk kanë dhënë një deklaratë zyrtare mbi shkakun e zjarrit, por burime nga hetimet paraprake nuk përjashtojnë mundësinë e një veprimi të qëllimshëm.
Ndërkohë, Bashkia Kukës dhe strukturat përgjegjëse u bëjnë apel qytetarëve që të mos ndezin zjarre në asnjë rrethanë, pasi kjo përbën vepër penale dhe dënohet nga ligji.
Po ashtu, i ftojnë të gjithë banorët të denoncojnë çdo rast të ngjashëm, për të mundësuar ndërhyrjen në kohë dhe vënien para përgjegjësisë të autorëve të mundshëm.
Marrë nga Top Channel
