Pamjet që shihni në këtë artikull janë sasitë e mëdha të kokainës që janë trafikuar në Europë nga grupi shqiptar, i cili kishte kontakte direkt me prodhuesit në Amerikën Latine. Bëhet fjalë për një sasi 16.4 tonë që i përkiste grupit shqiptar të goditur sot nga SPAK.
Zyrtarët gjermanë zbuluan 16 ton në pesë kontejnerë transporti që kishin mbërritur në portin e Hamburgut nga Paraguai në 24 shkurt 2021. Kokaina ishte fshehur në kanaçe me mbushës muresh (stuko), të cilat kishin hyrë në Evropë me një anije kontejnerësh nga Paraguai.
Zyrtarët e doganës vendosën t’i shqyrtonin nga afër kontejnerët paraguaianë pasi vunë re “parregullsi të qarta” me disa nga përmbajtjet – kanaçe prej kallaji që ishin menduar të mbusheshin me stuko. “Përtej një shtrese mallrash origjinale, të paketuara menjëherë pas derës së kontejnerit, kanaçe të shumta prej kallaji ishin në fakt të mbushura me mallra të tjera”, thanë zyrtarët.
Hetuesit më pas urdhëruan shkarkimin e kontejnerëve dhe gjetën kokainë të fshehur në më shumë se 1,700 kanaçe.
“Kjo është sasia më e madhe e kokainës së sekuestruar ndonjëherë në Evropë dhe një nga sekuestrimet më të mëdha të vetme në të gjithë botën”, thanë doganat gjermane, duke iu referuar vetëm ngarkesës së Hamburgut.
“Po vlerësojmë një vlerë shitjesh në rrugë midis 1.5 miliardë eurove dhe 3.5 miliardë eurove (1.8 miliardë dhe 4.2 miliardë dollarë) për 16 tonet”, tha zyrtari i doganës së Hamburgut, Rene Matschke, për agjencinë e lajmeve AFP.
Hamburgu është porti i tretë më i madh në Evropë dhe më i madhi në Gjermani, ndërsa Paraguai ka qenë një vend kyç tranziti për drogën për vite me radhë.
SPAK thotë se kjo organizatë kriminale operonte në një shkallë globale, duke bashkëpunuar me grupe të tjera kriminale për të lehtësuar transportet drejt porteve evropiane dhe investonte fitimet e mëdha në prona dhe biznese në Shqipëri dhe jashtë saj.
Drejtoria e Përgjithshme e Policisë së Shtetit në bashkëpunim me Byronë Kombëtare të Hetimit kanë ekzekutuar masat e sigurimit për 9 të hetuar (përfshirë edhe një nga drejtuesit), prej të cilëve 7 me masën “arrest me burg” dhe 2 me masën “detyrim paraqitje”, ndërsa një prej të hetuarve gjendet aktualisht i arrestuar në një vend të BE – së (drejtues i organizatës).
Ndërkohë, në kërkim janë dhe gjashtë shtetas të tjerë, të cilët nuk janë gjetur nga Policia dhe agjentët e BKH-së dhe SPAK thotë se po punohet për ekzekutimin e këtyre masave të tjera, në kuadër të këtij operacioni.
Marre nga Newsbomb.al
