Kryebashkiaku i dorëhequr i Vlorës Ermal Dredha u ka dërguar një mesazh falenderimi stafit të tij, pas dorëheqjes së bujshme që dha mbrëmë. Në mesazhin e dërguar në aplikacionin e komunikimit WhatsApp, Dredha falenderon stafin e tij për punën gjatë kësaj kohë. Ndërkohë që u kërkon ndjesë për punën që ka lënë në gjysëm.
“Kënaqësi të ju shërbeja, edhe pse nuk arrita t’ju zgjidhja të gjitha hallet. Faleminderit dhe më ndjeni që po e lë këtë rrugëtim në mes, por sinqerisht për mua ka qenë privilegj dhe kënaqësi t’ju shërbeja. Ju uroj më të mirën juve dhe familjeve tuaja, me shumë respekt, Ermali,” shprehet Dredha.
Ermal Dredha në muajt e fundit ka qenë pre e kritikave te vazhdueshme nga kryeministri Edi Rama. Kritikat e Ramës ndaj Dredhës kanë qenë si në mbledhjet private pa mediat, por edhe në daljet publike të Kryeministrit. Dredha është kritikuar edhe për mbetjet dhe për mungesën e punës nga ana e drejtorëve te bashkisë Vlorë. Rama shkoi aq shumë me kritika ndaj Dredhës, sa në një mbledhje me drejtorët e Bashkisë Vlorë, e quajti kryebashkiakun si ‘Dritan Leli 2.0’.
Marrë nga Dosja.al
