Mbrojtja në gjykimin e katër ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi nisi sot me dëshminë para Dhomave të Specializuara në Hagë.
Dëshmitari i parë i thirrur nga mbrojtja e Thaçit është ish-ndihmësi i sekretarit amerikan të Shtetit, James Rubin.
Në një prononcim për Top Channel, ambasadori i Shqipërisë në Hagë, Artur Kuko shpreson që të bëhet “drejtësi” në këtë proces gjyqësor.
“Unë kisha vetëm një koment të shkurtër: dje foli populli. Dhe ne kuptuan që liria ka jo vetëm emër por edhe zë të lartë, të fortë. Shpresojmë shumë për drejtësi në këtë proces”, u shpreh shkurtimisht Kuko.
Kujtojmë që edhe kryeministri Edi Rama ofroi mbështetje për protestën e shqiptarëve të zhvilluar në Hagë ku kërkoi drejtësi për veteranët e UÇK-së që kanë luftuar në emër të lirisë.
Marrë nga TCH
