Një tjetër sasi prej 520 ton misër nga Serbia është bllokuar sot në doganën e Hanit të Hotit. Sipas AKU-së, kontrollet laboratorike kanë treguar se misri përmban nivel të lartë të aflatoksinës, duke e bërë atë të rrezikshëm për ushqimin e kafshëve.
Sasia e misrit ishte porositur nga disa kompani shqiptare, të cilat më pas do ta shpërndanin në fermat blegtorale në vend.
Ky është rasti i tretë brenda pak ditësh ku bllokohet misër me të njëjtin problem. Dy ngarkesa të tjera u ndaluan disa ditë më parë, njëra në Elbasan dhe tjetra po në Han të Hotit.
Shkak është bërë aflatoksina, e cila konsiderohet një nga substancat më të rrezikshme kancerogjene, e cila jo vetëm dëmton kafshët, por përbën rrezik serioz edhe për njerëzit që konsumojnë mishin apo qumështin e tyre.
Marrë nga Newsbomb.al
