Bashkimi Europian synon t’i japë fund të gjitha importeve të gazit nga Rusia deri në fund të vitit 2027, sipas një marrëveshjeje të arritur në Bruksel midis përfaqësuesve të qeverive të 27 shteteve anëtare dhe Parlamentit Evropian.
Për kontratat afatgjata të furnizimit me gaz të lëngshëm, ndalimi do të hyjë në fuqi më 1 janar 2027, siç parashikohet në paketën e 19-të të sanksioneve të BE-së ndaj Rusisë. Për kontratat afatgjata të importit të gazit përmes tubacioneve, importet do të ndalohen nga 30 shtatori 2027, në varësi të përmbushjes së objektivave të stokut të gazit, dhe jo më vonë se 1 nëntori 2027.
Ndërkohë, katër burime në agjencinë e lajmeve Reuters raportuan dje se Komisioni Evropian synon të paraqesë një propozim zyrtar brenda javës për përdorimin e fondeve të bllokuara ruse për të financuar Ukrainën, gjë që lë të hapur edhe mundësinë e huamarrjes së përbashkët të BE-së nga tregjet financiare ndërkombëtare, ose një kombinim të dy opsioneve.
Udhëheqësit e BE-së ranë dakord në tetor të mbulojnë “nevojat urgjente financiare” të Ukrainës gjatë dy viteve të ardhshme, por nuk miratuan një plan për të përdorur 140 miliardë euro fonde të ngrira ruse në Evropë për të siguruar një kredi për Kievin, veçanërisht për shkak të shqetësimeve në lidhje me rreziqet ligjore të ngritura nga Belgjika.
Shumica e fondeve ruse të ngrira në Europë mbahen në depozitën belge të letrave me vlerë Euroclear.
Sipas propozimit të Komisionit, Ukraina do ta shlyente kredinë vetëm nëse Rusia do t’i ofronte kompensim për dëmet e luftës. Teksti pritet të miratohet të martën, thanë burimet e Reuters.
Një zëdhënës i Komisionit Europian nuk komentoi mbi përmbajtjen e tekstit kur u pyet për të nga agjencia, duke u kufizuar në deklaratën se komisionerët “do të shqyrtojnë opsionet” për financimin e Ukrainës dhe pritet të “miratojnë” propozimin për këtë.
Marrë nga Bloomberg.com
