Duket se qyteti bregdetar i Vlorës nuk po gjen qetësi. Pasi mbetën 5 ditë pa ujë në fillim të janarit për shkak të një defekti serioz në tubacionin qendror të ujit; pas mbylljes së zyrave të kadastrës në këtë qytet, ditën e djeshme dhe të sotme radha u erdhi tregtarëve të konfeksioneve që sipas një urdhri të drejtorisë së tatimeve, duhet të largohen për 1 javë nga tregu.
“Kemi takim me kryetaren e bashkisë. Na kanë sjellë nga një shkresë ku na thonë se për një javë duhet të largohemi nga tregu. Se ku do të shkojmë nuk e dimë. Po ne kemi 30 vjet aty. Kemi mallin aty. Sesi do bëhet hallit nuk e dimë”, thotë një zonjë ndërsa është e shqetësuar për gjithë mallin që ka në vendin ku është konsideruar si tregu i konfeksioneve.
Takimi i djeshëm me Bruna Mersinin kryetaren e Bashkisë së qytetit, nuk ka prodhuar ndonjë rezultat. Ditën e sotme në mëngjes, shumë prej tregtarëve serish kanë mësyrë në zyrat e bashkisë së Vlorës.
“Nuk po kërkojmë luks. Po kërkojmë zgjidhje” thotë një prej 200 tregtarëve me një punonjëse të bashkisë ditën e sotme.
“Ai pallat ku jeni nuk është I destinuar për treg. Do ndërtohet tregu I ri”, thotë punonjësja e bashkisë.
“Eshtë zgjidhje. Të gjithë këto familje ushqehen aty”, vazhdon tregtari vlonjat.
“Nuk është situata jote motër. Mos dil kur nuk e përballon dot situatën. Ne e kemi litarin në fyt. Ai zotëria që ka ardhur dje nuk na ka lajmëruar. Na ka sjellë një nekrologji, një dënim më vdekje për secilën familje. Na pyesni vetëm për votat, në momentet kritike nuk na jepni zgjidhje”, thonë banorët të shqetësuar.
Duket se bisedat mes kryebashkiakes dhe tregtarëve nuk kanë pasur një zgjidhje dhe mirëkuptim nga ana e tregtarëve. Janë afërsisht 200 tregtarë që prej shumë vitesh qëndrojnë në të njëjtën zonë.
Marrë nga Newsbomb.al
