Shembja e rrugës nacionale Librazhd–Prrenjas ka bllokuar Juglindjen e Shqipërisë, madje është paralizuar edhe tregtia me Maqedoninë e Veriut dhe një pjesë me Greqinë.
Madje, me urdhër nga sipër, disa zyrtarë të institucioneve shtetërore, u “rreshtuan” për të mbajtur një konferencë të kotë, teksa të gjithë po mundohen t’ia hedhin fajin “nënës natyrë”. “Shkaku kryesor i kësaj situate mbetet ndikimi i reshjeve intensive dhe të shtrira në kohë të gjatë, erozioni lumor si dhe saturimi i masivit të tokës, gjë që ka çuar në një rrëshqitje masive”, tha drejtori i ARRSH-së, Ami Kozeli, teksa edhe deklarata u mbështet nga përfaqësuesi i Shërbimit Gjeologjik.
Por, këta të pranishëm me apo pa dashje, anashkaluan shumëçka, teksa fshehën sërish përgjegjësit kryesor të shembjes. Cili zyrtar hapi tenderat për ndërtimin e rrugës? Cila firmë u përzgjodh për t’a projektuar? Kush po e ndërton atë segment ku ndodhi shembja? Sa para’ janë hedhur? Dhe, më kryesorja, a kanë firmosur zyrtarët e ARRSH-së për projektimin, ndërtimin apo mbikëqyrjen?!
Deri më tani, zyrtarët janë “fshehur”, duke tentuar t’ia hedhin fajin shiut që ka rënë. Në këto radhë, do të publikojmë disa dokumente, që hedhin dritë mbi përgjegjësit kryesorë të kësaj shembje.
Por, kush qëndronte pas firmës fituese?!
Vox News ka analizuar edhe studimet gjeologo-inxhinierike, të kryera në të gjithë gjatësinë e segmentit. “Qëllimi i këtij studimi është vlerësimi i karakteristikave fizike dhe mekanike të dherave dhe shkëmbinjve që janë pjesë e korridorit ku zhvillohet projekti ‘studim, projektim e zgjerimi i segmentit’”, thuhet në dokument.
Në të njëjtin dokument shkruhet se, të dhënat ekzistuese janë adaptuar me të dhënat e reja nga studime të mëparshme që janë bërë në këtë zonë, të cilat përfshijnë të dhënat mbi rrugën ekzistuese si dhe kushtet gjeologjike të zonave ku janë lokalizuar bypass-et.
“Nëpërmjet këtij studimi marrim informacion për të vlerësuar kushtet gjeologjike, kushtet hidrogjeologjike dhe për të identifikuar fenomenet që lidhen me kushtet e projektimit të zonës ku do të ndërtohet, duke siguruar të dhëna dhe rekomandime për të ndihmuar dhe mbështetur sa më shumë në përzgjedhjen e masave inxhinierike gjatë projektimit”, vijon dokumenti.
Në të gjithë gjatësinë e rrugës, dhe veçanërisht në fazën e katërt ku ka ndodhur rrëshqitja, punimet topografike u kryen nga grupi topografik i “InfraKonsult” sh.p.k. “Bashkangjitur këtij raporti është edhe raporti topografik, në të cilin shpjegohet metodologjia dhe pajisjet që janë përdorur për matjet” thuhet në dokument.
“Bashkëngjitur këtij raporti, janë materialet teknike si vizatimet dhe detajet teknike, preventivi, raporti gjeologjik, raporti hidraulik dhe hidrologjik, raporti i vlerësimit të ndikimit në mjedis, VNM” vijon dokumenti. Në fund, është edhe emri i drejtuesit ligjit të kompanive projektuese, Redi Struga.
Këto më sipër janë dokumente zyrtare, mjaft të aksesueshme nga çdo organ ligjzbatues. Prokuroria e ka shumë të thjeshtë për të shkuar te një nga përgjegjësit. Raporti ka emra inxhinierësh, shumën e akorduar dhe zyrtarët e ARRSH-së. Hetimet e mëvonshme mund të zbardhin rolin e gjithsecilit.
Në fund të vitit 2023, pasi më parë ishte bërë projektimi me raportet përkatëse, Autoriteti Rrugor Shqiptar, i cili në atë kohë drejtohej nga Evis Berberi, aktualisht i arrestuar për abuzime të tjera, si në ARRSH apo në KESH, shpalli firmën fituese që do të ndërtonte lotin e katër të atij segmenti.
Fitues u shpall kompania “A. N. K.”, e cila fitoi tenderin me vlerë 2.5 miliardë lekë, ose me këmbimin e sotëm valutor, mbi 25 milionë euro. Kohëzgjatja e punimeve është 24 muaj, teksa lidhja e kontratës u bë në vitin 2024.
Aktualisht, pronari me letra i firmës ANK, e cila fitoi gjithashtu të gjitha tenderët e ndërtimit të segmentit Korçë – Ersekë, është Agim Kola, vëllai i ish-deputetit të PS-së Ndue Kola. Por, njësoj siç ndodhi edhe në atë segment, ku pati shembje në Qafën e Qarrit, Kolën e kanë ndjekur shembjet edhe në këtë aks.
Më sipër, renditëm personat që tenderuan, projektuan apo po ndërtojnë këtë segment. Janë zyrtarë shtetërorë, kompani private dhe biznesmenë që kanë fituar dhjetëra miliona euro për punë publikë. Të gjithë, duhet të japin llogari për çdo qindarkë apo për vuajtjet e një krahine të tërë, e cila sot është izoluar si pasojë e abuzimeve të gjithsecilit. Nëse kanë apo jo përgjegjësi ligjore, penale, administrative, do të jenë institucionet ligjzbatuese apo kontrolluese që do ta cilësojnë.
Marrë nga VoxNews.al
