Departamenti Amerikan i Shtetit ka urdhëruar largimin e detyrueshëm të personelit jo-emergjent të qeverisë amerikane dhe familjarëve të tyre nga Jordania, Bahreini, Iraku, Katari dhe Kuvajti, për shkak të përkeqësimit të situatës së sigurisë në rajon.
Ky është urdhri i parë për largim të detyrueshëm që prej nisjes së operacioneve ushtarake të SHBA-së dhe Izraelit kundër Iranit, duke reflektuar nivelin e lartë të rrezikut në rajon, ndërsa Teherani po kundërpërgjigjet.
Megjithëse largimi i personelit nuk nënkupton mbylljen e plotë të ambasadave, stafi do të reduktohet në minimumin e nevojshëm, shkruan CNN. Ambasada e SHBA-së në Kuvajt ka njoftuar ndërkohë mbylljen “deri në njoftim të mëtejshëm”.
Departamenti i Shtetit u ka bërë thirrje qytetarëve amerikanë në të gjithë Lindjen e Mesme të largohen “tani” përmes linjave komerciale, por situata mbetet e vështirë pasi shumë kompani ajrore kanë pezulluar fluturimet. Deri më tani, qeveria amerikane nuk ka nisur fluturime evakuimi për qytetarët e saj.
Marrë nga Associated Press
