Komuniteti shqiptar është grupi më i madh i emigrantëve në lagjen “West New Brighton–Silver Lake–Grymes Hill” në New York. Sipas të dhënave të Population FactFinder të Departamentit të Planifikimit Urban të qytetit, të analizuara nga Visual Capitalist, kjo lagje rezulton si e vetmja në New York ku Shqipëria është vendi kryesor i origjinës për banorët e lindur jashtë vendit.
Pozicionimi i lagjes dhe ekonomia
West New Brighton, Silver Lake dhe Grymes Hill ndodhen në bregun verior të Staten Island, përballë Manhattanit, dhe përbëjnë një zonë kryesisht rezidenciale me një popullsi të kombinuar prej rreth 60 mijë banorësh. Historikisht, kjo zonë është zhvilluar si një komunitet i klasës së mesme, me ekonomi të mbështetur në sektorin e shërbimeve, administratën publike, arsimin dhe tregtinë lokale. Afërsia me terminalin e tragetit Staten Island Ferry, që lidh drejtpërdrejt zonën me Manhattanin, e ka bërë këtë lagje tërheqëse për emigrantët që punojnë në qendrën financiare dhe ekonomike të qytetit. Grymes Hill, në veçanti, njihet për institucione arsimore si Wagner College dhe për zonat e gjelbra, ndërsa Silver Lake është i famshëm për parkun dhe rezervuarin e tij historik.
Prania shqiptare në këtë zonë i bashkohet dhjetra komuniteve të huaja emigratore të New Yorkut, një qytet me mbi 8 milionë banorë dhe emigrantë nga pothuajse çdo cep i globit.
Cilat komunitete dominojnë lagjet e New York-ut?
Në total, të dhënat tregojnë se Kina është vendi me praninë më të përhapur, duke qenë grupi më i madh emigrant në 56 nga 211 lagjet e qytetit. Megjithatë, në nivel të përgjithshëm, Republika Dominikane mbetet komuniteti më i madh emigrant në të gjithë New Yorkun, duke përbërë mbi 12% të popullsisë së qytetit. Ndryshe nga komuniteti kinez, i cili është më i shpërndarë gjeografikisht në të pesë bashkitë, dominikanët janë më të përqendruar, veçanërisht në Bronx dhe në lagje të Upper Manhattan si Washington Heights, Inwood dhe East Harlem, zona që shpesh quhen “Little Santo Domingo”.
Përtej këtyre dy komuniteteve kryesore, New York mbetet një nga qytetet më të larmishme etnikisht në botë. Në Queens janë përqendruar mijëra emigrantë nga Karaibet, veçanërisht nga Xhamajka dhe Guajana, ndërsa në Brooklyn dhe Staten Island vazhdojnë të jenë të forta komunitetet evropiane si italianët, polakët dhe ukrainasit. Në të njëjtën kohë, komunitetet nga Amerika Latine, përfshirë meksikanët, ekuadorianët dhe kolumbianët, përbëjnë një pjesë të konsiderueshme të popullsisë, ndërsa emigrantët nga Azia Jugore, si indianët dhe bengalezët, janë gjithashtu të pranishëm në të gjithë qytetin.
Sot, në New York fliten mbi 800 gjuhë, një dëshmi e rolit të tij si një nga qendrat më të mëdha globale të emigracionit.
Marrë nga Ekofin.al
