Një operacion i gjerë policor në Ekuador, i zhvilluar pas një hetimi 20-mujor, ka çuar në arrestimin e 26 personave dhe sekuestrimin e rreth 300 kilogramëve lëndë narkotike. Të arrestuarit dyshohet se kanë lidhje me mafien shqiptare dhe grupet e krimit të organizuar.
Sipas mediave, hetimi kishte nisur në vitin 2024, pasi gjatë disa kontrolleve u zbuluan 1.1 tonë drogë. Ky zbulim thelloi hetimet, të cilat më vonë çuan në sekuestrimin e 2.5 tonëve të tjera. Sipas autoriteteve, droga e sekuestruar ka shkaktuar një humbje ekonomike të konsiderueshme për organizatat kriminale, që llogaritet në rreth 68 milionë dollarë.
Ministri i Brendshëm, John Reimberg, deklaroi se operacioni shkatërroi një rrjet të fuqishëm kriminal të përfshirë në trafikun ndërkombëtar të drogës. Ai theksoi se në aksion morën pjesë edhe organizata ndërkombëtare, përfshirë Policinë Mbretërore Kanadeze të Kalëruar, agjentët e së cilës bashkëpunuan në territorin ekuadorian për identifikimin e anëtarëve të rrjetit dhe koordinimin e veprimeve jashtë vendit.
Marrë nga Ecuavisa.com
