Çmimi i produktit të mishit është rritur ndjeshëm në vendet e Evropës, përfshirë edhe Shqipërinë, duke ndikuar drejtpërdrejt në buxhetin e familjeve shqiptare.
Sipas të dhënave të publikuara së fundmi, çmimet e mishit të viçit dhe të gjedhit kanë pësuar rritje të konsiderueshme në disa vende të Bashkimit Evropian.
Në vendin tonë rritja e çmimit është 6.2%, duke mbetur nën mesataren e BE-së.
Edhe në Kosovë është shënuar rritje me 14.1% gjatë vitit 2025.
Disa nga faktorët që e kanë shkaktuar këtë, sipas ekspertëve, janë kostot e prodhimit, kufizimet në furnizim dhe kërkesa e konsumatorëve në tregje të ndryshme.
Sa i takon gjendjes aktuale të prodhimit të mishit në vendin tonë, ajo është ulur ndjeshëm duke rritur importin me qëllim përmbushjen e kërkesës së konsumatorit. Varësia nga importi tregon një dobësim të kapaciteteve të prodhimit vendas.
Disa nga arsyet pse vendi ynë gjendet përballë këtij fakti lidhen me çmimet e ushqimeve për kafshët dhe energjinë e lartë që e bëjnë prodhimin vendas më pak konkurrues, rritja e importeve që dobëson sigurinë ushqimore dhe ekspozon tregun ndaj luhatjeve ndërkombëtare, teknologjia e vjetëruar dhe mungesa e subvencioneve që pengojnë rritjen e prodhimit vendas, si dhe fakti që shumica e fermave janë në hapësira të vogla dhe nuk arrijnë të prodhojnë në shkallë të gjerë.
Përputhja me standardet e Bashkimit Evropian mbetet ende një sfidë për shumë prodhues vendas.
Subvencionet dhe politikat mbështetëse, investimet në teknologji, kooperativat bujqësore dhe diversifikimi i prodhimit do të ishin disa nga rekomandimet për të përmirësuar tregun vendas me qëllim shkëputjen nga varësia e importit.
Marrë nga Newsbomb.al
