Procesi i integrimit të Shqipërisë në Bashkimi Europian ka hasur një tjetër pengesë. Autoritetet europiane kanë konfirmuar se nuk është miratuar Raporti i Vlerësimit të Përkohshëm të Standardeve (IBAR), një dokument thelbësor për ecurinë e negociatave me vendet kandidate.
Sipas burimeve nga Këshilli i Bashkimit Europian, raporti nuk ka marrë miratimin e nevojshëm nga vendet anëtare, çka do të thotë se procesi i negociatave nuk mund të avancojë me ritmet e parashikuara, raporton syri tv.
Raporti IBAR shërben për të vlerësuar nëse një vend kandidat ka përmbushur standardet kryesore që lidhen me shtetin e së drejtës, duke u fokusuar veçanërisht në kapitujt më të rëndësishëm të negociatave: drejtësinë, luftën kundër korrupsionit dhe krimit të organizuar, si dhe mbrojtjen e të drejtave themelore. Këto fusha lidhen kryesisht me kapitujt 23 dhe 24, të cilët konsiderohen thelbësorë në procesin e integrimit europian.
Pa miratimin e këtij raporti, asnjë kapitull negociatash nuk mund të mbyllet. Metodologjia e re e zgjerimit të BE-së e konsideron IBAR si një kusht të domosdoshëm për të vijuar përpara me procesin.
Çështja është diskutuar në dy mbledhje të Grupit të Punës për Zgjerimin dhe vendet negociuese me BE (COELA), të zhvilluara më 6 dhe 13 mars. Në këto takime, ambasadorët e vendeve anëtare kanë shqyrtuar raportin dhe pritet që fillimisht të arrihet një dakordësi në parim përpara miratimit përfundimtar.
Megjithatë, sipas burimeve diplomatike, një vendim për Shqipërinë është shtyrë dhe pritet të diskutohet edhe në mbledhje të tjera të COELA-s në javët dhe muajt në vijim. Në Bruksel theksohet se mund të ketë ende diskutime të shumta për këtë çështje.
Burime diplomatike bëjnë të ditur se në krye të vendeve që kanë shprehur rezerva për miratimin e raportit qëndron Gjermania, ndërsa edhe disa shtete të tjera anëtare kanë mbështetur këtë qëndrim.
Raporti IBAR konsiderohet si një “portë kyçe” për negociatat. Nëse ai miratohet pozitivisht, Shqipëria do të kishte mundësi të përshpejtonte procesin e integrimit dhe të niste mbylljen e kapitujve të parë të negociatave. Në të kundërt, vonesa në miratimin e tij rrezikon të zgjasë ndjeshëm rrugën e vendit drejt anëtarësimit në Bashkimin Europian.
Marrë nga Droni.al
