Mungesa e theksuar e krahut të punës po kthehet në një nga sfidat më serioze për ekonominë shqiptare, duke goditur veçanërisht sektorët e turizmit, mikpritjes dhe shërbimeve. Emigracioni i lartë i viteve të fundit, i shoqëruar me rënien e numrit të të rinjve në tregun vendas, ka krijuar boshllëqe të mëdha në fuqinë punëtore, të cilat bizneset po i ndjejnë gjithnjë e më shumë në sezonet me kërkesë të lartë.
Në këtë kontekst, Shqipëria po orienton politikat drejt hapjes ndaj punëtorëve të huaj si një zgjidhje e domosdoshme për të përballuar krizën. Autoritetet po shqyrtojnë mundësinë për të hapur rreth 20,000 vende pune për shtetas të huaj, kryesisht në sektorët që po vuajnë mungesën më të madhe të stafit.
Një nga drejtimet konkrete të kësaj strategjie është forcimi i bashkëpunimit me Filipinet, një vend me eksperiencë të konsoliduar në ofrimin e fuqisë punëtore në tregjet ndërkombëtare. Ambasadori jo rezident i Shqipërisë në Filipine, Ermal Muça, ka zhvilluar takime me zyrtarë të Departamentit të Punëtorëve Migrantë, ku është diskutuar zgjerimi i mundësive të punësimit për qytetarët filipinas në Shqipëri.
Palët kanë rënë dakord të përmirësojnë marrëveshjet për lëvizshmërinë e fuqisë punëtore dhe të forcojnë mekanizmat që garantojnë një proces të rregullt dhe të sigurt rekrutimi, duke shmangur praktikat abuzive dhe rekrutimin e paligjshëm. Gjithashtu, është vënë theksi tek garantimi i kushteve të drejta të punës dhe mbrojtja e të drejtave të punëtorëve.
Ky zhvillim shihet si një hap i rëndësishëm për Shqipërinë në përpjekje për të stabilizuar tregun e punës dhe për të mbështetur rritjen ekonomike, ndërsa për Filipinet krijon një kanal të ri punësimi për qytetarët e saj, në një model bashkëpunimi që pritet të zgjerohet edhe në të ardhmen.
Marrë nga Ekofin.al
