Informacioni ekonomik mbi ndërmarrjet tregon zhvendosje të dukshme të investimeve të bizneseve nga pasuritë e paluajtshme drejt teknologjisë dhe makinerive.
Të dhënat zyrtare të INSTAT tregojnë se në vitin 2024 bizneset kanë ulur ndjeshëm investimet në ndërtesa me rreth 30.9% në krahasim me 2023. Nga rreth 23, 8 miliardë lekë që ishte vlera e këtyre investimeve në 2023 ato ishin vetëm 16,4 miliardë lekë në 2024.
Gjithashtu rënie pësuan edhe investimet në toka me rreth 24 % duke shënuar një vlerë vetëm 12,7 miliardë lekë në 2024 nga 16.7 miliardë lekë në 2023. Paralelisht kanë rënë edhe investimet për ndërtime dhe instalime me 46% pasi janë të lidhura me ndërtesat.
Të dhënat tregojnë se bizneset i kanë kanalizuar investimet në makineri e pajisje. Investimet në këtë zë arritën në mbi 80 miliardë lekë në vitin 2024 me rritje 61% në krahasim me vitin 2023. Kjo zhvendosje e investimeve të bizneseve tregon për një kthesë pozitive që lajmëron rritje të produktivitetit.
Gjithashtu, investimet në mjetet e transportit kanë pësuar një rritje të fortë prej 34%, duke arritur vlerën e 22.1 miliardë lekëve në vitin 2024. Kjo rritje lidhet drejtpërdrejt me nevojën për logjistikë, nxitur nga rritja e fluksit të turizmit apo kërkesës për shërbime dhe mallra.
Shqipëria po përballet me një sfidë të madhe demografike dhe emigrim të krahut të punës. Për të mbajtur të njëjtin nivel prodhimi ose për t’u rritur, bizneset nuk mund të mbështeten më te numri i punonjësve. Rritja masive prej 61% në makineri tregon se sipërmarrësit po investojnë në teknologji që zëvendëson proceset manuale me ato automatike, duke rritur eficiencën pa pasur nevojë për shtim të personelit.
Bizneset po kuptojnë e se investimi në makineri dhe teknologji ka një kthim më të shpejtë mbi investimin dhe i bën ato zgjedhje më pak të rrezikshme. Bizneset shqiptare po kuptojnë se nuk mund të konkurrojnë më me kosto të ulët të krahut të punës, por me cilësi të produkte që garantohet nga teknologjia.
Nga ana tjetër ekonomia po lëviz drejt shpërndarjes së shpejtë dhe tregtisë online, duke bëre që bizneset të investojnë në flota transporti për të kontrolluar zinxhirin e furnizimit, duke reduktuar varësinë nga palët e treta.
Marrë nga Monitor
