Naim Stafuka, vëllai i Enver Stafukës, i cili u rrëmbye dhe u zhduk në shkurt të vitit 2015 në Fushë-Krujë, ishte i vetmi i pranishëm në sallën e gjyqit nga 12 të pandehurit në çështjen e njohur si një nga fraksionet e dosjes “Revanshi”, ku Prokuroria e Posaçme SPAK ka kërkuar në total mbi 127 vite burg.
Emiljano Shullazi dhe Astrit Avdyli, të dyshuar si drejtuesit e grupit të strukturuar kriminal, për të cilët prokuroria kërkoi nga 15 vite burgim për secilin, munguan në seancën gjyqësore, ashtu si edhe anëtarët e tjerë të grupit, për të cilët u kërkua më pak vite dënimi për akuzat e ngritura ndaj tyre.
Sipas pretencës së paraqitur në Gjykatën e Posaçme kundër Korrupsionit dhe Krimit të Organizuar (GJKKO), prokuroria ka kërkuar dënimin e 12 të pandehurve për veprat penale “sigurimi i kushteve dhe mjeteve për të kryer vrasje” dhe “pjesëmarrje në grup të strukturuar kriminal”, akuza që lidhen me disa episode kriminale të ndodhura gjatë viteve 2020–2021. Për shkak të gjykimit të shkurtuar, dënimet në total zbresin në rreth 85 vite e 8 muaj burg.
Pretenca është paraqitur më 9 prill 2026 nga prokurori Dritan Shehu, i cili ka ndarë rolin e të pandehurve sipas episodeve të ndryshme kriminale.
Sipas hetimeve, gjatë periudhës janar–korrik 2020, Astrit Avdyli, Emiljano Shullazi dhe Blerim Abazi, si dhe më pas Naim Stafuka në gusht të po atij viti, në bashkëpunim me persona të tjerë, kanë siguruar kushtet dhe mjetet materiale për të kryer vrasje në dëm të shtetasve Durim Bami dhe Valter Bami. Për Naim Stafukën, prokuroria ka kërkuar 9 vite burg, që me gjykim të shkurtuar zbresin në 6 vite, duke e lidhur atë me sigurimin e kushteve për kryerjen e vrasjes dhe pjesëmarrjen në grup të strukturuar kriminal.
Ndërkohë, për Blerim Abazin, Besian Xhixhën, Enver Divën dhe Robert Laçin janë kërkuar nga 10 vite burg, që me uljen për shkak të gjykimit të shkurtuar zbresin në 6 vite e 8 muaj burg. Sipas dosjes, këta të pandehur dyshohet se gjatë gusht-shtator 2020 kanë siguruar kushte për kryerjen e vrasjeve në dëm të shtetasit Preng Gjini.
Për Gjergj Cukalin është kërkuar dënimi me 10 vite e 6 muaj burg për sigurim kushtesh për vrasje ndaj dy personave. Ndërsa për Viktor Imerajn dhe Satilno Bashon janë kërkuar nga 10 vite burg për veprime të ngjashme të kryera gjatë periudhës 2020-2021 ndaj shtetasve Elvis Gacaj dhe Altin Gega. Për Miri Brulin dhe Xhelal Rrajën janë kërkuar nga 9 vite burg.
Kërkesat e Prokurorisë për dënim për 12 të pandehurive
Lexo me shumë …
- Astrit Avdyli, 15 vite burg, 10 vite me gjykim të shkurtuar
- Emiljano Shullazi, 15 vite burg, me gjykim të shkurtuar 10 vite
- Naim Stafuka, 9 vite burg, 6 vite burg me gjykim të shkurtuar
- Gjergj Cukali, 10 vite e 6 muaj burg, me gjykim të shkurtuar 7 vite burgim
- Viktor Imeraj, 10 vite burg, me gjykim të shkurtuar 6 vite e 8 muaj burg
- Satilno Basha, 10 vite burg, me gjykim të shkurtuar 6 vite e 8 muaj burg
- Xhelal Rraja, 9 vite burg, me gjykim të shkurtuar 6 vite burg
- Blerim Abazi, 10 vite burg, me gjykim të shkurtuar 6 vite e 8 muaj burg
- Miri Bruli, 9 vite burg, me gjykim të shkurtuar 6 vite burg
- Besian Xhixha, 10 vite burg, kthehet në 6 vite e 8 muaj burg me gjykim të shkurtuar
- Enver Diva, 10 vite burg, me gjykim të shkurtuar 6 vite e 8 muaj burg
- Robert Laçi, 10 vite burg, me gjykim të shkurtuar 6 vite e 8 muaj burg
Pë këtë dosje, SPAK ka kërkuar në total rreth 127 vite e 6 muaj burg për 12 të pandehurit, të cilët sipas akuzës kanë vepruar në kuadër të një grupi të strukturuar kriminal me role të ndryshme në sigurimin e kushteve për vrasje të planifikuara.
Hetimet e SPAK mbështeten edhe në komunikimet e përgjuara përmes platformës së koduar SKY ECC, të cilat sipas prokurorisë kanë dokumentuar veprimtarinë e grupeve të strukturuara kriminale në disa qytete të vendit, përfshirë Tiranën, Durrësin, Lezhën, Vlorën, Krujën dhe Burrelin.
Prokuroria pretendon se janë dokumentuar rreth 12 ngjarje kriminale të ndodhura ose të planifikuara gjatë viteve 2020-2021, që lidhen me vrasje, tentativa vrasjeje, trafik dhe kultivim të lëndëve narkotike, si dhe përdorim të armëve pa leje. Hetimet përshkruajnë përplasje mes grupeve rivale, ku dyshohet se janë planifikuar atentate dhe eliminime fizike ndaj personave të ndryshëm, përfshirë edhe figura të njohura, me role të ndara mes organizatorëve, financuesve dhe ekzekutorëve të planeve kriminale. Një pjesë e akuzave lidhet edhe me bashkëpunimin e dyshuar të disa ish-zyrtarëve të policisë, të cilët dyshohet se kanë ndihmuar grupet kriminale duke dhënë informacione mbi operacionet policore dhe duke lehtësuar aktivitetin e paligjshëm.
Prokuroria pretendon se ka dokumentuar rolin e të pandehurve ndaj të cilëve janë ngritur akuza për “Sigurimin e kushteve për të kryer vrasje” në formën e “Grupit të strukturuar kriminal”. Sipas njoftimit zyrtar të SPAK, në maj 2024 janë sekuestruar pasuri me vlerë rreth 4.5 milionë euro, që përfshijnë bizhuteri dhe ora të shtrenjta, flori, euro cash, armë zjarri, automjete luksoze të blinduara, sisteme vrojtimi me kamera, tavolinë pokeri dhe sende të tjera me vlerë.
Marrë nga Shteg.org
