Gjigandi italian Fincantieri do të prodhojë në Vlorë anije të vogla dhe të mesme për tregun ndërkombëtar. Shoqëria shtetërore e industrisë ushtarake, Kayo nënshkroi në Tiranë marrëveshjen e bashkëpunimit me kompaninë Italiane, që aktualisht është prodhuesi më i madh i anijeve tregtare dhe ushtarake në Europë.
“Nga ky bashkëpunim ka disa vlera strategjike që arrihen. Shqipëria bëhet një bazë e re europiane e “Fincantieri- t” për anijet e vogla dhe të mesme. Fincanteri zgjeron kapacitetin prodhues në Shqipëri dhe “Kayo” pozicionohet si një partner i besueshëm industrial me një arkitekturë ndërkombëtare. Modeli i biznesit është që mbi 90% e klientëve janë ndërkombëtarë, klientë ekzistues të “Fincantier-it,” tha ministri i Mbrojtjes, Ermal Nufi.
Kayo dhe Fincantieri do të themelojnë një shoqëri të përbashkët. Projekti parashikon krijimin e një kantieri të ri në Pashaliman, ku pritet të punësohen rreth 400 persona.
“Kjo marrëveshje është një lajm shumë i mirë për të rinjtë, për vajzat e djemtë e shkollës industriale të Vlorës, të cilët do të jenë të parët, të cilët do të kontaktohen dhe do të ftohen për të marrë pjesë në një rrugëtim formimi të përshtatur për të qenë nesër dhe jo në një të ardhme të largët, por në një të ardhme shumë të afërt pjesëmarrës, të kësaj shoqërie të re ekselence në territorin e tyre, pra në qytetin e tyre të lindjes dhe ata sigurisht do të jenë të shoqëruar në rrugën e tyre të formimit nga profesionistët e Fincantieri-t dhe do të arsimohen si në Itali, pikërisht aty ku Fincantieri ka dhe shpirtin e saj, bazën e saj, por edhe në Shqipëri, në Pashaliman ku ky shpirti i dytë themi do të marri jetë së shpejti,” tha kryeministri, Edi Rama.
Sipas tij, Shqipëria do të përfitojë e para nga prodhimi i kësaj shoqërie të re, me ndërtimin e dy anijeve të para për Forcat e Armatosura, duke e çuar në shtatë numrin total të flotës detare, në përputhje me standardet e NATO për rolin e vendit në Mesdhe.
Prodhimi i anijeve pritet të vijojë më tej edhe për eksport, duke synuar tregjet ndërkombëtare dhe duke sjellë teknologji të avancuar dhe inovacion në industrinë detare shqiptare.
Marrë nga Kapitali.al
