Qeveria ka ndërhyrë sot në një nga vendimet kyçe për pronat publike në jug të vendit, duke ndryshuar VKM nr.297, datë 20.4.2016, dhe duke i hapur rrugën ndryshimit të pronësisë së Rezidencës Qeveritare në Sarandë.
Në vitin 2016, kjo pronë i ishte kaluar Bashkisë Sarandë me kushte të qarta dhe kufizuese: përdorim publik për programe arsimore dhe ndërtimin e një eko-kampusi, ndërsa ishte vendosur shprehimisht se ndalohej ndryshimi i destinacionit, tjetërsimi apo dhënia në përdorim të tretëve, raporton skyweb.al.
Vendimi i sotëm e rrëzon këtë barrierë.
Qeveria ka hequr pikërisht këtë pikë dhe, paralelisht, ka futur në dokument referencën për zhvillimin e projektit “Poli i Zhvillimit Turistik Sarandë”, duke i hapur praktikisht derën një transformimi të plotë të pronës.
Kjo lëvizje nuk vjen në vakum.
Më herët, Fondi Shqiptar i Zhvillimit kishte hartuar një projekt të detajuar për këtë zonë, që parashikon ndërtimin e një hoteli, një restoranti dhe një strukture akomoduese në formën e apart-hotelit, duke e kthyer gjithë kompleksin në një destinacion turistik dhe kulturor…sipas FSHZ.
Rezidenca ndodhet në “Kodrën e Gjashtës”, një nga zonat më strategjike dhe panoramike të Sarandës, dhe shtrihet në rreth 3 hektarë.
Objekti, një vilë e periudhës komuniste e përdorur për pushime dhe takime të niveleve të larta shtetërore, konsiderohet një nga asetet më të rëndësishme publike në zonë.
Sipas dokumenteve të projektit, synohet krijimi i një “Eco-Smart Campus”, që ndërthur turizmin, edukimin dhe aktivitetet kulturore, por në praktikë përfshin edhe zhvillime të mirëfillta komerciale. Plani parashikon restaurimin e vilës ekzistuese duke ruajtur identitetin historik, ndërsa rreth saj ndërtohen struktura të reja për akomodim, shërbime dhe aktivitete sociale.
Heqja e ndalimit për tjetërsim e bën këtë skenar jo vetëm të mundur, por të afërt.
Një pronë që deri dje ishte e bllokuar për përdorim publik, sot lirohet nga kufizimet ligjore dhe futet në një logjikë zhvillimi ku përfshirja e privatit bëhet e pashmangshme.
Marrë nga Sklyweb.al
