Përplasja e hapur mes Ryanair dhe operatorëve të aeroporteve në Greqi po prodhon pasoja të drejtpërdrejta në hartën ajrore të rajonit, duke i dhënë një avantazh të ri Shqipërisë si një nga tregjet më tërheqëse për operimet e kompanisë.
Pas njoftimit për mbylljen e bazës me tre avionë në Selanik për sezonin dimëror 2026 dhe reduktimit me 45% të kapaciteteve, Ryanair ka bërë të qartë se po orienton flotën dhe investimet drejt vendeve më konkurruese. Në listën e destinacioneve që konsiderohen më të favorshme për operim, kompania përmend drejtpërdrejt Shqipërinë, Suedinë, Italinë dhe Sllovakinë, si tregje me tarifa më të ulëta dhe kushte më tërheqëse.
Vendimi vjen pas një konflikti të ashpër me Fraport Greece, të cilin Ryanair e akuzon për rritje të tarifave deri në 66% që nga viti 2019 dhe për mungesë fleksibiliteti në një periudhë të vështirë për industrinë, të ndikuar nga çmimet e larta të karburantit dhe pasiguria gjeopolitike.
Në këtë kontekst, Shqipëria po del si një nga përfituesit kryesorë të kësaj zhvendosjeje strategjike.
Ryanair ka hapur tashmë një bazë operative në Aeroportin Ndërkombëtar të Tiranës, duke vendosur avionë dhe duke zgjeruar rrjetin e linjave drejt destinacioneve europiane. Kjo bazë pritet të marrë një rol edhe më të rëndësishëm pas tërheqjes nga Selaniku, pasi kompania kërkon të kompensojë kapacitetet e humbura në tregje të tjera.
Faktori kryesor mbetet ekonomik. Në një treg ku “çdo cent ka rëndësi”, siç theksojnë drejtuesit e kompanisë, Ryanair po favorizon aeroportet me tarifa më të ulëta dhe politika më fleksibël. Pikërisht këto elemente e bëjnë Shqipërinë më konkurruese në raport me Greqinë, ku tarifat dhe kostot operacionale janë kthyer në pengesë për zgjerimin e operimeve.
Zhvendosja e fokusit drejt Tiranës nuk është vetëm një vendim afatshkurtër për dimrin 2026, por një sinjal për një ripozicionim më të gjerë në rajon. Në një kohë kur konkurrenca mes aeroporteve europiane është në rritje, TIA po konsolidohet si një nyje strategjike për linjat low-cost në Ballkan.
Marrë nga Skyweb.al
