Një kompani shqiptare me administrator shtetas të huaj dyshohet se ka tentuar të përfitojë mbi 1 milion euro përmes transaksioneve me një kartë bankare belge përmes terminaleve POS. Ky rast përbën një nga modelet më të sofistikuara të pastrimit të parave.
Sipas raportit të AIF 2025, shoqëria shqiptare “X”, e themeluar me objekt aktiviteti “import-eksport dhe tregtim me shumicë dhe pakicë të mallrave ushqimorë dhe industrialë”, krijoi marrëdhënie biznesi me një bankë të nivelit të dytë në Shqipëri më 6 dhjetor 2024.
Kompania administrohej nga shtetasi i huaj A. Më 24 dhjetor 2024 ajo vendosi në përdorim 2 terminale POS dhe menjëherë nisi testime me një kartë të huaj të lëshuar nga një bankë belge, me kartëmbajtës shtetasin belg B.
Raporti tregon se më 26 dhjetor 2024, shoqëria X kreditoi llogarinë e saj përmes POS-it me 96,000 euro. Nga kjo shumë, rreth 83,000 euro u tërhoqën menjëherë nga llogaria.
Më 31 dhjetor 2024, llogaria u kreditua sërish përmes POS me 152,000 euro. Po atë ditë, kompania tentoi të kryente edhe një tjetër transaksion prej 790,000 eurosh, por tentativa dështoi pasi transaksionet u bllokuan nga Mastercard International.
Sipas raportit, më 3 janar 2025 banka në Shqipëri u njoftua nga Mastercard për shkak se kompania kishte tentuar të kalonte limitin e lejuar të kartës dhe kishin lindur dyshime mbi natyrën e transaksioneve. Si rezultat, banka bllokoi llogaritë e shoqërisë X dhe nisi menjëherë procedurën “charge back”.
Në total, transaksionet e kryera dhe ato në tentativë përmes POS arrinin në rreth 1,000,000 euro.
Për të justifikuar këto lëvizje financiare, shoqëria X paraqiti fatura tatimore me vlera të njëjta me transfertat në favor të subjektit belg “Y”. Sipas dokumentacionit, mes dy kompanive ishte lidhur një marrëveshje më 1 shtator 2024, ku parashikohej që kompania shqiptare të ofronte shërbime si eskortë, makina me qira dhe “VIP makina me qira”, me një vlerë totale shërbimesh prej 2,500,000 eurosh.
Raporti evidenton se vetëm një muaj përpara kryerjes së transfertave, kompania shqiptare kishte shtuar në objektin e aktivitetit edhe shërbimin “Agjenci Turistike, Udhëtimesh”.
Agjencia e Inteligjencës Financiare ngre dyshime se kompania shqiptare X dhe subjekti belg Y mund të jenë përfshirë në një skemë mashtrimi financiar dhe potencialisht edhe në shkelje të natyrës fiskale dhe tatimore.
Sipas raportit, elementet që ngritën dyshime lidhen me përfitimin e fondeve në vlerë 1,034,688 euro përtej limitit të lejuar të kartës duke shfrytëzuar dobësi në procesin e automatizimit paraprak, përdorimin e POS-it në vend të transfertave bankare tradicionale, kryerjen e transaksioneve në një periudhë shumë të shkurtër gjatë festave të fundvitit dhe shtimin e aktivitetit “Agjenci Turistike, Udhëtimesh” vetëm pak javë para lëvizjeve financiare.
AIF thekson gjithashtu se shërbimet e deklaruara nga kompania shqiptare nuk përputheshin me aktivitetin që ajo kishte ushtruar ndër vite në Shqipëri. Për këto arsye, rasti është referuar pranë organeve ligjzbatuese për vlerësim dhe hetime të mëtejshme, përfundon raporti.
Marrë nga Ekofin.al
