Policia greke ka arrestuar 20 persona në ishullin e Kretës, të dyshuar si pjesë e një rrjeti kriminal që mashtronte me subvencionet bujqësore të Bashkimit Evropian. Sipas hetimeve, grupi kishte ngritur një skemë të sofistikuar për të përfituar miliona euro përmes deklarimeve të rreme të tokave bujqësore. Në qendër të dosjes ndodhen dy kontabilistë dhe disa punonjës shtetërorë, të cilët dyshohet se ndihmonin fermerët të paraqisnin aplikime false.
Autoritetet thonë se aktiviteti i paligjshëm ka nisur që prej vitit 2019 dhe shuma e përfituar ka kaluar mbi 3 milionë euro. Arrestimet janë pjesë e një hetimi më të gjerë të Prokurorisë Publike Evropiane, e cila po ndjek raste të ngjashme mashtrimi me fondet bujqësore në Greqi. Vetëm vitin e kaluar, dhjetëra fermerë u akuzuan për falsifikim pronësie të kullotave për të marrë subvencione.
Skandali ka shkaktuar tronditje politike në Athinë, duke sjellë dorëheqje ministrash dhe tensione të forta mes qeverisë dhe opozitës. Opozita ka kërkuar zgjedhje të parakohshme, ndërsa parlamenti grek në prill votoi heqjen e imunitetit për 13 deputetë të partisë në pushtet “Demokracia e Re”, me kërkesë të prokurorëve evropianë.
Kryeministri Kyriakos Mitsotakis ka kërkuar që hetimet të përfundojnë sa më shpejt, në mënyrë që të qartësohet nëse do të ngrihen akuza zyrtare ndaj deputetëve, ndërkohë që qeveria përpiqet të menaxhojë pasojat politike përpara zgjedhjeve parlamentare të vitit 2027.
Marrë nga Kathimerini.gr
