Ekonomia prodhuese në Shqipëri ka hyrë në vitin 2026 me dy ritme të ndryshme. Industria ka shënuar rënie në shitje, prodhim dhe punësim, ndërsa ndërtimi dhe energjia kanë vijuar rritjen, duke mbajtur pozitivë treguesit kryesorë të prodhuesve të të mirave.
Të dhënat e INSTAT për tremujorin e parë 2026 tregojnë se industria shënoi rënie të shitjeve neto në volum me 3.1% krahasuar me të njëjtën periudhë të një viti më parë. Edhe prodhimi në volum ra me 4.9%, ndërsa numri i të punësuarve në industri u ul me 2.9%.
Rënia e industrisë tregon një dobësim të sektorit prodhues tradicional, sidomos në një periudhë kur pjesë të tjera të ekonomisë vijojnë të zgjerohen.
Megjithatë, fondi i pagave në industri u rrit me 7.5%, çka tregon se rënia e prodhimit dhe punësimit nuk është shoqëruar me ulje të totalit të pagesave në sektor.
Në kontrast me industrinë, ndërtimi vijon të jetë një nga sektorët më dinamikë të ekonomisë. Në tremujorin e parë të vitit, shitjet neto në volum në ndërtim u rritën me 8.6%, ndërsa prodhimi në volum u rrit me 7.2% krahasuar me të njëjtën periudhë të vitit të kaluar.
Rritja është reflektuar edhe në tregun e punës. Numri i të punësuarve në ndërtim u rrit me 5.6%, ndërsa fondi i pagave shënoi rritjen më të fortë mes sektorëve kryesorë, me 22.4%.
Kjo e bën ndërtimin një nga motorët kryesorë të ekonomisë në fillim të vitit 2026.
Sektori vijon të mbështetet nga kantieret e hapura në qytetet kryesore, projektet rezidenciale, ndërtimet tregtare dhe investimet në pasuri të paluajtshme.
Një tjetër sektor që ka dhënë kontribut të fortë pozitiv është energjia. Sipas INSTAT, aktiviteti “Energji elektrike, Gaz, Avull” regjistroi rritje të shitjeve neto në volum me 17.6%, ndërsa prodhimi në volum u rrit me 45% krahasuar me tremujorin e parë të vitit 2025.
Rritja e prodhimit në energji është më e larta ndër sektorët e analizuar, duke e bërë këtë aktivitet një faktor të rëndësishëm në ecurinë pozitive të prodhuesve të të mirave gjatë tremujorit të parë.
Edhe sektori i furnizimit me ujë, trajtimit dhe menaxhimit të mbetjeve rezultoi në rritje. Shitjet neto në volum u rritën me 15.1%, prodhimi me 5.6%, ndërsa fondi i pagave u rrit me 18.5%.
Të dhënat tregojnë se ekonomia prodhuese po ecën me dy shpejtësi. Nga njëra anë, industria po përballet me rënie të aktivitetit dhe punësimit; nga ana tjetër, ndërtimi, energjia dhe shërbimet e lidhura me ujin dhe mbetjet po vijojnë të zgjerohen.
Brenda industrisë, goditja më e fortë vjen nga industria nxjerrëse. Sipas tabelave të INSTAT, shitjet neto në këtë segment ranë me 28.1%, ndërsa prodhimi në volum u tkurr me 26.7%.
Industria përpunuese, në të kundërt, pati rritje modeste të shitjeve me 2.5% dhe të prodhimit me 1%.
Kjo tregon se rënia e industrisë në tërësi është ndikuar kryesisht nga dobësimi i industrisë nxjerrëse, ndërsa përpunimi ka qëndruar në territor pozitiv, por me ritme të ulëta.
Në plan afatshkurtër, të dhënat konfirmojnë se ndërtimi dhe energjia po mbajnë peshën kryesore të rritjes në sektorët prodhues.
Por varësia e lartë nga kantieret dhe nga ecuria e energjisë ngre pikëpyetje për qëndrueshmërinë e rritjes, nëse industria nuk rikthehet në zgjerim.
Marrë nga Skyweb.al
