Akademiku Artan Fuga ka shprehur kritika të ashpra ndaj funksionimit të Kuvendit të Shqipërisë, duke deklaruar se institucioni duhet të shpallë afatet për vetëshpërndarjen e tij.
Ai kujtoi përvojën e tij në komisionet parlamentare për kulturën, shkencën, arsimin dhe rininë, duke thënë se është zhgënjyer nga mënyra e funksionimit të tyre.
Sipas Fugës, në këto komisione ka hasur “kotësi, mungesë përgjegjësie, rreshtim partiak dhe mungesë kompetencash profesionale”. Ai shtoi se vite më parë vendosi të mos marrë më pjesë në mbledhjet e komisioneve parlamentare, pasi, sipas tij, pjesëmarrja ishte e pavlerë.
“Ishte e kotë, dukej sikur merrje pjesë në një mbledhje kukullash me mekanizma të prishur brenda barkut prej kashte”, shprehet Fuga në reagimin e tij.
POSTIMI I FUGËS
E mira është që Kuvendi i Shqipërisë të shpallë afatet e vetëshpërndarjes së tij! Nëse deputetëve u ka mbetur një fije përgjegjësie morale dhe sociale!
Për sa më përket, kur më ka qëlluar të jem në komisione të Kuvendit të Shqipërisë për çështje të kulturës, shkencës, arësimit, rinisë, etj., kam vënë duart në kokë nga kotësia, nga mungesa e përgjegjësisë, nga rreshtimi partiak, nga mungesa e kompetencave profesionale, përse jo edhe nga budallallëku i ndonjë deputeti apo deputeteje.
Por, nuk rikthehem më me emra se historia i ka hedhur në kosh! Kjo më ka bërë disa vite më parë të deklaroj se refuzoj nga ai çast e tutje të marr pjesë në ndonjë mbledhje komisioni kuvendor.
Ishte e kotë, dukej sikur merrje pjesë në një mbledhje kukullash me mekanizma të prishur brenda barkut prej kashte.
Marrë nga Droni.al
